Զայն Մալիկը նշում է 30-ամյակը․ 7 հետաքրքիր փաստ երգչի մասին (ֆոտո/վիդեո)
16:14 12 հունվարի, 2023Հայտնի երգիչ Զայն Մալիկն այսօր՝ հունվարի 12-ին, նշում է ծննդյան 30-ամյակը։ Այս առթիվ առանձնացրել ենք մի քանի հետաքրքիր փաստ One Direction-ի նախկին անդամի մասին։
Արտիստի լրիվ անունը Զայն Ջավադ Մալիկ է։ Նա ծնվել է Բրեդֆորդ քաղաքում։ Երգչի հայրը պակիստանցի է, մայրը՝ անգլուհի։
Զայնը դաստիարակվել է որպես մուսուլման։ Բացի անգլերենից նա նաեւ տիրապետում է ուրդուին եւ արաբերենին։ 2018 թ-ին, սակայն, բրիտանական Vogue-ին տված հարցազրույցում երգիչը նշել է, որ իրեն այլեւս մուսուլման չի համարում։
Դպրոցական տարիքում Մալիկն արդեն ստեղծագործում էր ռեփ ժանրում։ Նա առաջին անգամ բեմում ելույթ է ունեցել հայտնի երգիչ Ջեյ Շոնի հետ, երբ վերջինն այցելել էր իրենց դպրոց։
15-ից 17 տարեկանում Մալիկը հաճախել է բռնցքամարտի։ Մինչ երգչի կարիերա սկսելը ապագա աստղը մտադրություն է ունեցել մասնագիտանալու անգլերեն լեզվի ոլորտում, քանի որ ցանկանում էր դառնալ անգլերենի ուսուցիչ։
Նա միակ արտիստն է, որը երկու անգամ նվաճել է Billbioard մրցանակաբաշխության «Տարվա լավագույն նոր արտիստ» տիտղոսը։ Առաջին անգամ երգիչը մրցանակին արժանացել է One Direction խմբի կազմում, եկրորդ անգամ՝ որպես սոլո արտիստ։
Բացի երաժշտական գործունեությունից, Զայնը զբաղվում է նաեւ բարոգործությամբ եւ սոցիալական ակտիվությամբ։ Երգիչը British Asian Trust բարեգործական կազմակերպության դեսպանն է, որի նպատակն է բարելավել հաշմանդամություն ունեցող մարդկանց կյանքը Հարավային Ասիայում։ 2020 թ-ին Մալիկը 10 հազար եվրո է նվիրաբերել 5-ամյա աղջնակի կյանքը փրկելու համար։
Ինչ վերաբերում է Զայն Մալիկի անձնական կյանքին՝ 2015 թ-ից նա հարաբերությունների մեջ էր մոդել Ջիջի Հանդիդի հետ։ 2020 թ-ին լույս աշխարհ եկավ զույգի դուստրը, սակայն 2021 թ-ին, այն բանից հետո, երբ մոդելի մայրը՝ Յոլանդա Հադիդը, երգչին մեղադրեց իրեն հարվածելու մեջ, Զայնն ու Ջիջին բաժանվեցին։
Լուսանկարները՝ Kevork Djansezian/Getty Images, Vogue, Getty Images