Schiaparelli նորաձեւության տան կրեատիվ դիզայներ Դանիել Ռոզբերին ոգեշնչման համար բազմիցս օգտվել է արխիվային էսքիզներից: Փարիզի նորաձեւության շաբաթվա իր ցուցադրության մեջ զգացվում է Էլզա Սկիապարելլիի ազդեցությունն՝ իր սյուրռեալիզմով եւ տեսողական պատրանքներով: Հավաքածուն կոչվում է «Inferno Couture». Դանթեի «Աստվածային կատակերգության» յուրօրինակ ընթերցումը զգացվում է յուրաքանչյուր աշխատանքում։ Առաջին բանը, որ աչքի է ընկնում, ստվերապատկերն է:
Ամբողջ ուշադրությունը կենտրոնացված է մոդելների բարակ գոտկատեղի եւ հիպերտրոֆիկ ուսերի վրա: Դիզայները ոչ միայն խաղում է չափերի հետ, այլ ընդգծում է դրանք տեսողական պատրանքներով, ինչպես դա արել է ինքը ՝ Էլզա Սկիապարելլին: Սա հատկապես վառ է արտահայտվում բարակ գծավոր տաբատե կոստյումի եւ ամբողջ մեջքի երկարության վիկտորյական ժանյակով հիասքանչ վերարկուի վրա: Նման ժանյակը մեկ անգամ չէ, որ կկրկնվի ցուցադրության ժամանակ: Հավաքածուի կարեւոր թեման կենդանիներն են։ Այդպես դիզայները նուրբ հումորով հղում է անում Դանթեին։ Մենք տեսնում ենք լուսանի, առյուծի եւ գայլի գլուխներով զգեստներ։ Հենց այս կենդանիներն են «Աստվածային կատակերգության» մեջ խորհրդանշում մարդկային երեք արատները եւ խանգարում ստեղծագործության հերոսին:
Դիզայները կենդանիների թեմատիկան ցուցադրում է ոչ միայն արհեստական մորթու միջոցով: Այն հանդիպում է բազմաթիվ մոդելներում ծովախեցու կամ էկզոտիկ թռչունի կերպարով: Դրանցից շատերը զարդարված են մարգարիտով, քարերով եւ մետաղով։ Եվ եւս մեկ անդրադարձ Էլզա Սկիապարելլիին՝ շեշտադրումներ կրծքի վրա: Այդպիսի զգեստներից մեկը հստակ պահում է ծովային թեմատիկան, որն առկա է ցուցադրության մեջ: Իսկ այլ կերպարներում շեշտադրումն արված է ամբողջական քանդակների կամ մոդելի մարմնի վրա:
«Inferno Couture»-ը միավորում է անհամաչափությունն ու նրբագեղությունը, սյուրռեալիզմը եւ դասականը:
Լուսանկարները՝ Instagram