Մկրտիչ Արզումանյանին բաժին հասած նոր առեղծվածն ու Իվետայի դերը․ «Գործակալ 044. Օպերացիա Գառնի» ֆիլմի առաջին մանրամասները (ֆոտո)
15:50 7 փետրվարի, 2023Գործակալ Հենզել Բրուտենցը վերադառնում է։ «Գործակալ 044. Օպերացիա Գեղարդ» ֆիլմի հայտնի հերոսը, որին մարմնավորում է Մկրտիչ Արզումանյանը, նոր՝ «Գործակալ 044. Օպերացի Գառնի» ֆիլմում կբացահայտի հերթական առեղծվածը։ NEWS.am STYLE-ի հետ զրույցում ֆիլմի ռեժիսոր Հայկ Կբեյանը հետաքրքիր մանրամասներ է հայտնել ֆիլմի երկրորդ մասի, դերասանական կազմի եւ նկարահանումների մասին։
Նկարահանումները մեկնարկել են ամռանը, դրանք տեղի են ունեցել Հայաստանում՝ Երեւանում, Գառնիում եւ Դիլիջանում։ Ռեժիսորի խոսքով՝ պրոդյուսերական թիմը սցենարային մտահաղացումը վաղուց է ունեցել, բայց հաշվի առնելով երկրում տիրող իրավիճակները՝ այն իրականացրել են օգոստոս ամսին։
«Այս անգամ ֆիլմի հիմքում Գառնիի պատմությունն է։ Միջազգային կոնֆերանսին ընդառաջ տեղի է ունենանում լրագրողի առեւանգում, որը բացահայտելու գործը կրկին վստահվում է Հենզել Բրուտենցին։ Երեւան․․․ Գառնի․․ Դիլիջան․․ շղթան բացվում է կամաց-կամաց ու գտնում իր հանգուցալուծումը։ Մկրտիչ Արզումանյանը կրկին կերպարանափոխվում է։ Վստահ եմ, որ սցենարական առումով եկրորդ ֆիլմը նոր մոտեցումներ է ներկայացնում, կարծում եմ՝ այն ոչ միայն չի զիջում առաջին ֆիլմին, այլեւ պիտի, որ որոշակի առումով, նույնիսկ, գերազանցի։ Իրական գնահատականն, իհարկե, կտա հանդիսատեսը»,-պատմում է Հայկ Կբեյանը։
Նրա խոսքով՝ ինչպես առաջին ֆիլմը, երկրորդը եւս աչքի է ընկնում գեղեցիկ ու գրագետ երկխոսություններով, չկան ժարգոնային արտահայտություններ, իսկ որոշ հատվածներ նվիրված են հայրենասիրական թեմաներին, որոնք, ըստ ռեժիսորի, մերօրյա են ու արդիական։
Արկածային պատմության առանցաքային կերպարներից մեկին մարմնավորում է Իվետա Մուկուչյանը։ Երգչուհին մասնակցություն չուներ առաջին ֆիլմում, բայց այս մասում նրա դերակատարությունը մեծ է ու կարեւոր․
«Իվետա Մուկուչյանը մարմնավորում է Հենզել Բրուտենցի գործընկերուհուն։ Նրա եւ Մկրտիչ Արզումանյանի կերպրները ֆիլմի սկզբից միասին են անցնում բոլոր բացահայտումների միջով։ Նրանց փոխկապակցված համագործակցության արդյունքում էլ գտնվում են կարեւոր հարցերի պատասխանները»,-ասում է Հայկը։
Ֆիլմում հանդիսատեսը կտեսնի ինչպես հին, այնպես էլ՝ նոր կերպարների։ Նոր թիմին միացել են Արման Ղազարյանը, Անդրանիկ Հարությունյանը, Սերգեյ Սարգսյանը, Կարինե Ջանջուղազյանը եւ այլք։
«Գործակալ 044. Օպերացի Գառնի» ֆիլնը մեծ էկրաններ կբարձրանա մարտի 2-ից։ Ցուցադրություններ նախատեսվում են ոչ միայն Երեւանում, այլեւ՝ Հայաստանի մի շարք մարզերում ու քաղաքներում։ Ռեժիսորի խոսքով՝ հետագայում, գուցե, լինեն ցուցադրություններ նաեւ Ռուսաստանում եւ ԱՄՆ-ում։
Սյունե Առաքելյան
Լուսանկարները տրամադրել է Հայկ Կբեյանը