EL0NMUSK, BAD G1RL. Անվանական համարանիշները ցանկալի շքեղություն են Հոնկոնգում
21:39 15 փետրվարի, 2023Հոնկոնգում կառավարական աճուրդում «EL0NMUSK» համարանիշը վաճառվել է 1405 դոլարով, հայտնում է CNN-ը։
Տեխնոլոգիական հսկայի համանուն համարանիշը մի շարք վաճառվածներից մեկն է, այդ թվում՝ «BAD G1RL», «LATTE» եւ «SHADYB1Z», որոնք հայտնվել են մուրճի տակ հունվարի վերջին: Ամենաբարձր առաջարկը բաժին է ընկել «1 HH»-ին՝ 115,000 հոնկոնգյան դոլարով (14,684 դոլար):
Հայտնի է, որ Հոնկոնգի բնակիչները պատրաստ են միլիոնավոր դոլարներ ծախսել բաղձալի պետհամարանիշի համար։ 2008 թվականին երջանիկ թիվ համարվող «18» պետհամարանիշը վաճառվել է 2,1 միլիոն դոլարով։ Ութ տարի անց 28-ը վաճառվեց 2,3 միլիոն դոլարով:
Վերջին ամանորյա աճուրդում «R»-ը վաճառվել է 3,2 մլն դոլարով։ Սակայն ռեկորդը սահմանվել է 2021 թվականի մարտին, երբ հայտատուներից մեկը 3,3 միլիոն դոլար է ծախսել մեկ տառով «W» նշանի համար:
Տրանսպորտի նախարարության ներկայացուցիչը CNN-ին ասել է, որ անհատականացված համարանիշերի աճուրդներից ստացված ողջ հասույթը ուղղակիորեն գնում է Հոնկոնգի կառավարության գանձարան:
Ավտոմեքենաների սեփականատերերի համար ցուցանակները կարող են անձնական նշանակություն ունենալ։ Անշարժ գույքի մագնատ Սեսիլ Չաոն 2007 թվականին գնել է իր CEC1L-ը համեմատաբար ցածր գնով՝ 2550 դոլարից մի փոքր ավելի: Այժմ նա զարդարում է նրա Rolls Royce-ը։
Ի դեպ, գնորդները նախ պետք է պարզեն, թե արդյոք իրենց առաջարկած նշանը համապատասխանում է տրանսպորտի վարչության պահանջներին։ Տրանսպորտային միջոցների սեփականատերերը կարող են ստեղծել մինչեւ ութ նիշ ունեցող համարանիշներ (ներառյալ բացատները), սակայն չեն կարող ներառել «I», «O» եւ «Q» տառերը: