Կենդանական պրինտը շարունակում է մնալ թրենդում․ հայ եւ համաշխարհային աստղերի ընտրությունը (ֆոտո)
22:07 17 փետրվարի, 2023Պրինտերը գալիս ու գնում են, բայց կենդանական պրինտերը, կարծես, ամեն տարվա հետ նոր լուծումներով են վերադառնում նորաձեւության աշխարհ։ Դրանք դարձել են ոչ միայն արտասահմանյան, այլեւ հայկական շոու-բիզնեսի նորաձեւ հայտնիների զգեստապահարանների անբաժանելի մասնիկը։ Տարեց տարի այս թրենդը թարմացվում է նոր շեշտադրմամբ ու գույներով։
NEWS.am STYLE-ը շարունակում է խոշորացույցի տակ պահել հայ եւ համաշխարհային հայտնիների ինստագրամյան էջերը․ դատելով նրանց թարմ հրապարակումներից՝ կենդանական պրինտը դեռ երկար կմնա մեզ հետ 2023-ի ընթացքում։
Այս տարի, ինչպես եւ 2022-ին, հատկապես նորաձեւ է զեբրային պրինտը։ Սեւ զոլերն, ընդ որում, կարող են լինել ինչպես ավանդական սպիտակի, այնպես էլ տարբեր վառ գույների վրա։ Աստղիկ Սաֆարյանի զգեստապահարանում այս պրինտը, կարծես, իր ուրույն տեղն ունի։
Ամերիկացի երգչուհի Քեթի Փերին այսօր պատրաստվում է հյուրընկալվել Ջիմմի Քիմմելի հանրահայտ շոուին։ Ինչպես երեւում է երգչուհու ինստագրամյան հրապարակումից՝ նա եւս այսօրվա համար նախապատվությունը տվել է զեբրային պրինտին։
Ամերիկաբնակ երգչուհի Մարտա Կիրակոսյանն էլ իր ձմեռային կերպարն է ամբողջացրել այս պրինտի լուծումներով։ Իր էջի վերջին լուսանկարում Մարտան կրում է մարմնագույն թրենչ, որի թեւքերին ու պարանոցային հատվածին վառ հետաքրքրություն է հաղորդում զոլավոր վերնաշապիկը։
Քարդաշյանների ընտանիքում վագրային պրինտը շարունակում է մնալ առաջին տեղում։ Այս լուսանկարներում, օրինակ, Քլոե Քարդաշյանը որոշել է ոչ թե վագրային դետալ ընտրել, այլ մի ամբողջ look շեշտել հենց այդ պրինտի օգնությամբ։ Իսկ դուք այսպիսի հագուստ կընտրեի՞ք։
