Դիզայներ եւ ճարտարապետ Նորո Խաչատրյանի աշխատանքները կներկայացվեն COLLECTIBLE դիզայնի միջազգային տոնավաճառում
13:20 24 փետրվարի, 2023Հայ դիզայներ եւ ճարտարապետ Նորո Խաչատրյանի աշխատանքները կներկայացվեն 21-րդ դարի COLLECTIBLE դիզայնի միջազգային տոնավաճառում, որը կանցկացվի մարտի 9-ից 12-ը Բրյուսելում։
Աշխարհահռչակ Galerie VIVID-ը, որը հիմնադրվել է 1999 թվականին Ռոտերդամում, այս տարի առաջին անգամ կմասնակցի COLLECTIBLE-ին՝ ներկայացնելով Խաչատրյանի աշխատանքը։
COLLECTIBLE-ը միակ միջազգային հարթակն է, որը միավորում է ժամանակակից դիզայնի լավագույներին: COLLECTIBLE-ը ներկայացնում է ստեղծված եւ ձեւավորվող պատկերասրահների, դիզայն ստուդիաների ու ճարտարապետների խնամքով ընտրված ընտրանի: Տոնավաճառը ձգտում է ցուցադրել միայն բարձրորակ եւ լավ ուսումնասիրված առարկաներ, որոնք արտացոլում են վերջին միտումները՝ կենտրոնանալով նորույթների, եզակի իրերի եւ սահմանափակ արտադրանքների վրա:
Ծնունդով հայ Նորո Խաչատրյանը, որը բնակվում է Բելգիայում, վարպետ է իր ստեղծած առօրյա իրերը ճարտարապետության, դիզայնի համադրելու գործում:
Իր ստեղծագործությունների մեջ ներառելով մաթեմատիկական մոտեցում՝ Խաչատրյանը պարզեցնում է առարկաները մինչեւ դրանց ամենահիմնական մակարդակը՝ ստեղծելով մինիմալիստական ուրվագիծ:
Դիզայները թույլ է տալիս նախնական նյութին փայլել. այն պահանջում է գրաֆիկական, պարզեցված մոտեցում: Architectural Digest Middle East-ին տված հարցազրույցում Խաչատրյանը նշել է․ «Նյութերը մեծ դեր են խաղում իմ բոլոր նախագծերում: Ես միշտ փորձում եմ հասկանալ դրանց հատկություններն ու էական բնույթը, այլ ոչ թե շահարկել դրանք: Դա հաջողության բաղադրատոմս է»:
Խաչատրյանն անկախակալ մտքով է մոտենում յուրաքանչյուր նախագծին. նա ոգեշնչում է գտնում քաղաքային լանդշաֆտների ու դասական ճարտարապետության մեջ: Նա 2010 թվականին հիմնել է «Studio Khachatryan»-ը եւ վերջին տասնամյակում միաժամանակ զբաղվում է կահույքի, առարկաների եւ ճարտարապետության նախագծմամբ։ Վերջին տասը տարիների ընթացքում նա մշակել է «կարեւոր տեսողական լեզու, որը հիմնված է պարզ երկրաչափության եւ նյութերի հարուստ գունապնակի վրա»։