Հանրային հեռուստաընկերության «4 երազանք» հեռուստասերիալն ունենալու է երկրորդ եթերաշրջան։ Առաջին ալիքն առայժմ նոր եթերաշրջանի առնչությամբ պաշտոնական հայտարարությամբ հանդես չի եկել, սակայն NEWS.am STYLE-ին հայտնի է դարձել, որ հեռուստասերիալի երկրորդ եթերաշրջանում նկարահանվում է նաեւ բլոգեր Շուշան Ստեփանյանը։ Բլոգերն Instagram-ում հրապարակում է արել՝ տեղեկացնելով, որ շուտով հանդես է գալու գլխավոր դերում, սակայն առայժմ չի մանրամասնել, թե որ նախագծում։
Տարածված լուրերը պարզելու նպատակով կապ հաստատեցինք Հանրային հեռուստաընկերության Հանրային կապերի եւ թվային հաղորդակցության ծառայության ղեկավար Աննա Օհանյանի հետ։ Նա հաստատեց, որ հեռուստասերիալն ունենալու է երկրորդ եթերաշրջան. այստեղ կերպարներն արդեն մեծացել են եւ շարունակում են հետեւել իրենց երազանքներին: Առավել մանրամասների համար Աննա Օհանյանը խորհուրդ տվեց հետեւել Հանրայինի նորություններին:
Առաջին ալիքի եթերում «4 երազանք» հեռուստասերիալի առաջին եթերաշրջանը բաղկացած էր 61 մասից: Այն երեխաների եւ ծնողների համար էր ու ներկայացնում էր, թե ինչպես էին դպրոցականները պայքարում եւ իրագործում իրենց նպատակները: Գլխավոր դերերում էին Հարություն Խաչատրյանը, Արտուշ Բաղդասարյանը, Մարիա Պետրոսյանը, Արա Հարությունյանը, Հայկ Հովհաննիսյանը, Աբել Աբելյանը, Իննա Խոջամիրյանը, Գոռ Հակոբյանը, Արաքսյա Մելիքյանը, Իշխան Ղարիբյանը, Ֆրունզիկ Ամիրխանյանը, Անահիտ Քոչարյանը:
Սյունե Առաքելյան