Նիք Ջոնասը պատմել է 1-ին տիպի շաքարային դիաբետի դեմ պայքարի մասին
11:28 15 մարտի, 2023Jonas Brothers խմբի 30-ամյա երգիչ Նիք Ջոնասը SXSW կոնֆերանսի ժամանակ ելույթ է ունեցել որպես բանախոս՝ քննարկելով դիաբետի դեմ պայքարը եւ խոսել է 13 տարեկանից այս հիվանդությամբ ապրելու մասին: Այս մասին հայտնում է Just Jared-ը։
«Հետաքրքիր ճամփորդություն էր ոչ միայն ինձ համար, այլեւ իմ ողջ ընտանիքի ու շրջապատի համար: Բայց ես կարծում եմ, որ այն բանից հետո, երբ դուրս եկա այդ իրավիճակից ու սկսեցի կարգավորել իմ գլյուկոզայի մակարդակը, ցանկացա առաջնահերթություն դարձնել այս հիվանդության մասին իրազեկվածության բարձրացումը երիտասարդների շրջանում», - կիսվել է կատարողը:
Austin American-Statesman-ին տված հարցազրույցում Նիք Ջոնասը խոսել է նաեւ ֆիզիկական եւ հոգեկան առողջության միջեւ կարեւոր հարաբերությունների մասին։ «Հոգեկան առողջությունը շատ կարեւոր թեմա է, որն ազդում է մեր կյանքի բոլոր ասպեկտների վրա: Երբ դա կապում ես այնպիսի հիվանդության հետ, ինչպիսին շաքարային դիաբետն է, բնականաբար, դա արձագանք է ունենում», - հայտարարել է երգիչը։
Նիք Ջոնասը վերջերս համագործակցել է Dexcom ընկերության հետ՝ նկարահանվելով Super Bowl 2023 գովազդային հոլովակում՝ խթանելու շարունակական գլյուկոզայի մոնիտորները: