Մշակութային արժեքներ, զանազանություն ու համախմբվածություն. Հայաստանում մեկնարկում են Ֆրանկոֆոնիայի օրերը

13:36   15 մարտի, 2023

Հայաստանում պաշտոնապես մեկնարկեցին Ֆրանկոֆոնիայի օրերը: Մշակութային տարբեր միջոցառումների շրջանակում կտարածվեն ֆրանսերենն  ու ֆրանսիական մշակույթը՝ ընգծելով նաեւ տոնի կարեւորագույն հաղորդագրությունները: Այս տարի, հատկապես, կշեշտադրվեն բազմազանությունն ու համերաշխությունը:

«Միշտ էլ մեծ պատիվ է Ֆրանկոֆոնիայի օրերը ներկայացնել Ֆրանկոֆոնիայի անդամ երկրում: Կարծում եմ՝ բոլորն են հիշում 2018 թ-ի Ֆրանկոֆոնիայի գագաթնաժողովը, որը տեղի ունեցավ Հայաստանում: Այս տարվա միջոցառումը նվիրված է զանազանությանը, քանի որ այս պահին ավելի քան կարեւոր է մատնանշել այդ բազմազանության կարեւորությունը: Ավելի քան երբեւէ կարիք կա համախմբվելու: Ֆրանկոֆոնիան նաեւ կարեւորում է հավասարությունն ու մարդու իրավունքների արժեքները»,-այսօր՝ մարտի 15-ին, Հայաստանում Ֆրանկոֆոնիայի օրերի մեկնարկին նվիրված ասուլիսին ընդգծեց Հայաստանում Ֆրանսիայի արտակարգ եւ լիազոր դեսպան Անն Լույոնը:

Ֆրանկոֆոնիայի տոնն ամբողջ աշխարհում կմիավորի ավելի քան 520 միջոցառում, որոնցից շատերը կանցկացվեն Հայաստանում: ՀՀ կրթության, գիտության, մշակույթի եւ սպորտի նախարար Ժաննա Անդրեասյանը վստահ է, որ բոլոր միջոցառումները նպաստելու են մեր երկրում ֆրանսերենի ու ֆրանսիական մշակույթի տարածմանը:

«Ֆրանկոֆոնիայի միջազգային օրը համախմբում է շուրջ 320 միլիոն ֆրանսախոսների ու հնարավորություն ընձեռում տոնելու համերաշխությունն ու միասին ապրելու ցանկությունը՝ ներկայացնելով նաեւ Ֆրանկոֆոնիայի արժեքները: Հայաստանը շատ մեծ պատասխանտվությամբ ու ակտիվությամբ է մասնակցում Ֆրանկոֆոնիայի միջազգային կազմակերպության շրջանակում իրականացվող բոլոր միջոցառումներին եւ նախաձեռնություններին: Շատ ուրախ ենք, որ երեկ առիթ ունեցանք հյուրընկալելու Ֆրանկոֆոնիայի խաղերի միջազգային կոմիտեի նախագահին, եւ Հայաստանը հետաքրքրություն է ներկայացրել Ֆրանկոֆոնիայի խաղերը 2027-ին այստեղ կազմակերպելու մասով: Սա եւս մեկ վկայություն է, որ Հայաստանը մեծ կարեւորություն է տալիս Ֆրանկոֆոնիայի օրերին»,-իր խոսքում նշեց նախարարը:

Կարեւորելով ֆրանսերենն ու ֆրանկոֆոն մշակույթների արժեքները՝ «Ֆրանկոֆոնիայի օրեր 2023»-ը կներկայացնի ավելի քան քսան միջոցառում Երեւանում եւ մարզերում։ Ծրագրում տեղ կհատակցվի ֆրանսիական կինոյին, երաժշտությանը, թատրոնին, ժամանակակից արվեստին, կկազմակերպվեն նաեւ բանավեճեր ու ֆրանսերենի իմացության մրցույթ։

Միջոցառումները կազմակերպել են Ֆրանսիայի դեսպանությունը, Ֆրանսիական ինստիտուտը եւ Ֆրանկոֆոնիայի միջազգային կազմակերպության անդամ ու դիտորդ երկրների այլ դեսպանությունները, ինչպես նաեւ Հայաստանի մշակութային ու կրթական հաստատությունները:

 

Սյունե Առաքելյան



© NEWS.am STYLE