Wine Story. հայկական վեց գինիներ մեդալներ են ստացել Լոս Անջելեսում կայացած Գինու միջազգային մրցույթում
10:47 20 ապրիլի, 2023Հայկական վեց գինիներ մեդալներ են ստացել Լոս Անջելեսում կայացած Գինու միջազգային մրցույթում։ Այս մասին հայտնում է Հայաստանից նրբահամ գինիներ ներկրող «Storica Wines»-ը։
Արծաթե մեդալներ են շնորհվել Voskevaz Karasi Collection Voskehat, Shofer Voskevhat, Shofer Areni և Van Ardi Red Blend գինիներին: Ոսկե մեդալ եւ 90 միավոր է ստացել «Ոսկեվազ Արենին», իսկ դասի լավագույն մրցանակն ու 94 միավոր՝ Keush Cuvée Couchanne Brut Sparkling Rosé-ը:
Գինիները պատրաստվում են Հայաստանի հնագույն տեղական խաղողի սորտերից, որոնցից երկուսն են ամենահայտնին Ոսկեհատն ու Արենին։ Ոսկեհատը բուրավետ սպիտակ խաղող է՝ մրգային նոտաներով, հավասարակշռված թթվայնությամբ եւ թարմացնող հանքային նոտաներով, որը նման է Սեմիլյոնին եւ Շարդոնեին։ Արենին նման է Գամեին, որն առաջարկում է վառ մրգային նոտաների խառնուրդ՝ չափավոր թթվայնությամբ:
«Մենք գոհ ենք այս տարվա Լոս Անջելեսի գինիների միջազգային մրցույթում մեր գինիների գրանցած արդյունքներից, հատկապես մեր նոր պորտֆոլիոյի որոշ արտադրանքներից, ինչպիսիք են Keush Sparking Rosé եւ Shofer կարմիր ու սպիտակ գինիները: Սա հայաստանյան գինիների որակի եւս մեկ ապացույց է, եւ մենք հուսով ենք, որ Լոս Անջելեսի համայնքը կընդունի այս գինիները եւ այս տարի կգա տոնավաճառ՝ համտեսելու վարդագույնը», - ասել է Storica Wines-ի համահիմնադիր եւ նախագահ Զակ Արմենը։
Keush Cuvée Couchanne Rosé-ն Արենի խաղողից պատրաստված փրփրուն գինի է, որը ստացվել է Հայաստանի Խաչիկ գյուղի արտադրողներից։ Գինին հնեցվում է առնվազն 22 ամիս, այն ունի կարմիր մրգերի եւ թխվածքաբլիթի նոտաներ՝ կծու թթվայնությամբ ու ուժեղ հանքային նոտաներով։