«Մայրիկ ջան, ես կատարեցի մեր ցանկությունը»․ դերասանուհի Տատյանա Սպիվակովան հաղթահարել է Արարատի բարձունքը (ֆոտո)
13:05 4 սեպտեմբերի, 2023Անվանի դիրիժոր եւ ջութակահար Վլադիմիր Սպիվակովի եւ դերասանուհի, հաղորդավարուհի Սաթի Սպիվակովայի (Սաթենիկ Սահակյանց) դուստրը՝ դերասանուհի Տատյանա Սպիվակովան, դարձել է այն երջանիկներից, ովքեր հաղթահարել են Արարատի բարձունքը։ Ջիվան Ավետիսյանի «Դրախտի դարպասը» ֆիլմի գլխավոր դերակատարուհին հուզիչ գրառմամբ է կիսվել ինստագրամյան էջի Story բաժնում։
«Այսպիսով, սա տեղի ունեցավ։ Գիշերը 6 ժամ բարձրանալուց հետո ես արեւածագին կանգնած եմ Արարատի գագաթին՝ 5137 մետր բարձրության վրա»,-անգլերենով գրել է Սպիվակովան, այնուհետեւ հայերենով հավելել,-«Մայրիկ ջան, ես կատարեցի մեր ցանկությունը»։
Դերասանուհին նշել է, որ իր ողջ ուղին անցել է իր նախնիների «առաջնորդությամբ»։ «Դեռեւս չեմ կարողանում ճիշտ բառեր գտնել։ Երբեք այսքան կյանքով լեցուն, այսքան շնորհակալ ինձ չեմ զգացել։ Ես միշտ կհիշեմ այս պահը»։
Посмотреть эту публикацию в Instagram
Սաթի Սպիվակովան եւս ինստագրամյան իր էջում անդրադարձել է դստեր հաջողությանը։ «Որքան, որ ինձ հիշում եմ, բոլոր հայերի համար սուրբ լեռը՝ Արարատը, անհավանական երազանք էր թվում։ Տատյանա, դու իմ կուռքն ես։ Թող այսուհետ բոլոր բարձունքները քեզ տրվեն»,-գրել է նա։