Բուլղարիայի Գաբրովո քաղաքում օրերս տեղի ունեցավ գյումրեցի արվեստագետ-զարդագործ Արտակ Թադեւոսյանի ցուցահանդեսը։ Այն կայացավ «Արվեստների եւ արհեստների էթնիկ փառատոն»-ի շրջանակում, որին իրենց աշխատանքներն էին ներկայացրել էթնիկ տարբեր երկրների արվեստագետներ եւ արհեստավորներ՝ մեկտեղելով մշակութային ասելիքն ու դարձնելով փառատոնը մեծ իրադարձություն:
Արտակ Թադեւոսյանի ասելիքը ինքնատիպ էր: Նա իր տաղավարում ներկայացրել էր զարդեր, որոնք պատրաստված են փամփուշտից։ Փամփուշտը նրա ձեռքում վերածվում է զարդի, արվեստի արժեք ունեցող էթնիկ ասելիքով մի խորհրդանիշի, որն ուղղված է խաղաղությանն ու համերաշխությանը:
Արտակը պայքարի փամփուշտները պահում է առանձին, առանց ձուլելու, առանց փոփոխելու: Ներկայացված էին միայն այն փամփուշտներից գործեր, որոնց առաքելությունը խաղաղությունն էր:
Փառատոնի շրջանակում արվեստագետը փորձել է ներկայացնել նաեւ այսօրվա ցավը' արցախյան գոյապայքարը, որի հիմքում շուրջ 120.000 բնակչության հանդեպ կիրառվող հոգեբանական տեռոր է իրականացվում ադրբեջանցիների կողմից: Արտակն իր գործերով փորձում է բարձրաձայնել, որ քանի դեռ չկա խաղաղութուն, պատերազմը շարունակվում է, իսկ եթե դա այդպես է, ուրեմն պետք է լինել պատրաստ:
Գաբռովո քաղաքի քաղաքապետարանի մշակութային բաժնի առաջարկությամբ Արտակ Թադեւոսյանը հանդիպելէ նաեւ քաղաքապետին եւ առաջարկել, որ Գյումիրն եւ Գաբրովոն մշակութային կապերով փոխկապակցված քույր քաղաքներ լինեն։ Համաձայնությունը ստանալով' Արտակը այն փոխանցել է Գյումրու քաղաքապետին։