«Ռոզալի» ֆիլմի պրեմիերան ու արտասովոր «կարմիր» գորգը՝ հայտնիների մասնակցությամբ (VIDEO)
15:24 27 հոկտեմբերի, 2023Ի՞նչը կնպաստի, որ ռոբոտը ձեռք բերի մարդկային հատկանիշներ, եւ ի՞նչ կլինի դրանից հետո: Ռեժիսոր Դավիթ Բաբախանյանի «Ռոզալի» ֆիլմի ռոբոտ հերոսուհին ապացուցում է՝ մարդկային հատկանիշների ձեւավորման գլխավոր գործոնը սերն է:
«Ռոզալի» ֆիլմը «Շարմ» հոլդինգի ռոմանտիկ կատակերգությունն է, որը պատմում է հայաստանյան գաղտնի լաբորատորիաներից մեկում ստեղծված կին-ռոբոտի մասին: Ռոզալին աչքի է ընկնում ոչ միայն հզոր արհեստական բանականությամբ. նրանում ինտեգրված են սինթետիկ հորմոններ, որոնց շնորհիվ կարողանում է մտածել ու զգալ իրական մարդու պես: Բայց մարդկային զգաղմունքներ՝ սեր, խանդ, կիրք, երջանկություն, ատելություն ու կարոտ ձեռք բերելու համար ռոբոտն ու ֆիլմի հերոսը՝ Առաքելը, պետք է յուրահտուկ փորձարկման փուլ անցնեն:
Посмотреть эту публикацию в Instagram
Ֆիլմի գլխավոր հերոսներին մարմնավորում են Տարոն Իսպիրյանն ու Նաստասյա Գոլովկոն:
Պետք է միշտ փոխվելու հնարավորություն գտնել. կարծում է Տարոն Իսպիրյանը, որը մարմնավորում է Առաքելին։ Դերասանը նշում է՝ ինքը ֆանտաստիկ ժանրի ֆիլմերի սիրահար չէ. այս ժանրում իր ամենասիրելի ֆիլմը «Ռոզալի»-ն է դարձել:
«Սա ժամանցային ֆիլմ է, որի 1 ժամ 35 րոպեն, կարծում եմ, անցնում է մեկ շնչով: Թեթեւ, սիրուն, հուզիչ եւ զարմացնող ֆիլմ է: Նաստասյայի հետ առաջին անգամ ենք աշխատում, եւ ես, պարզապես, հիացած եմ իմ գործընկերուհու պրոֆեսիոնալիզմով: Հրաշալի դերասանուհի է, որը պահում էր նկարահանման ամբողջ շունչը»,-ասում է Տարոն Իսպիրյանը:
Ֆիլմի գործադիր ռեժիսոր Դավիթ Բաբախանյանի խոսքով՝ արհեստական բանականությանն անդրադառնալը ոչ մի կոնկրետ նպատակ չհետապնդող միտք էր. պարզապես, փորձել են մտածել մի բան, որը կգրավի հանրության ուշադրությունը: «Կարծում ենք՝ սա այն միտքն է, որը ժամանակակից է, արդիական է եւ հետաքրքիր երիտասարդ սերնդի համար: Ֆիլմում կա կարեւոև մեսիջ՝ դարձեք մարդ: Ֆիլմի ընթացքում մեր հերոսուհին, որը ռոբոտ է, ձեռք է բերում մարդկային հատկանիշներ»,-ասում է նա: Անդրադառնալով գլխավոր դերակատարների ընտրությանը՝ Բաբախանյանը հավելում է,-«Հերոսուհու դերում ընտրել եմ Նաստյային, քանի որ հասկացել եմ, որ նրա կերպարով ավելի հեշտ կլինի ստանալ ռոբոտ աղջկան: Նա եւ հայտնի է, եւ հայտնի չէ, մեր հանրության շրջանում արտաքնապես անսովոր է: Իսկ Տարոնը բոլորիս սիրելի հումորային կերպարներից է, որն այս դերով բացահայտում կլինի շատերի համար»:
Ֆիլմի պրոդյուսեր Արման Միտոյանի խոսքով՝ ընտրել են այնպիսի թեմա, որը, բոլորին է հետաքրքիր: «Ըստ իս՝ Դավիթ Բաբախանյանն այն լավագույն ռեժիսորներից է, որի մոտ շատ լավ է ստացվում կատակերգական ժանրը»,-պատմում է նա։ Իսկ հարցին՝ արդյոք ֆիլմը կունենա՞ շարունակություն, Միտոյանը պատասխանեց,-«Ֆիլմն ավարտվում է զարգացման ակնկալիքով, ամեն ինչ կախված է նրանից, թե ինչքանով կդառնա սիրված, բայց վստահ եմ, որ այդպես էլ կլինի, ու այն կունենա շարունակություն»:
Ֆիլմի գլխավոր պրոդյուսերը Ռուբեն Ջաղինյանն է: Ֆանտաստիկ կատակերգությունում նկարահանվել են նաեւ Սուրեն Թումասյանը, Վազգեն Զաքարյանը, Ալբերտ Սաֆարյան, Լիլիթ Ավդալյանը, Օլյա Հակոբյանը, Դիանա Տոռեսը եւ այլք:
Սցենարի հեղինակներ՝ Աշոտ Աբրահամյան, Դավիթ Բաբախանյան եւ Ռուբեն Ջաղինյան:
Սյունե Առաքելյան