Աֆիշա․ ո՞ւր գնալ այս շաբաթ

Նոյեմբերի 14. Ա. Սպենդիարյանի անվան օպերայի եւ բալետի ազգային ակադեմիական թատրոնում «Ձգողականություն» է։ Սա բալետի անվանում է, որի հիմքում Լեւոն Շանթի «Հին Աստվածներ» դրաման է։ Բեմադրող դիրիժոր՝ Կարեն Դուրգարյան, լիբրետոյի եւ գեղարվեստական գաղափարի հեղինակ՝ Նարինե Գրիգորյան, բեմադրող բալետմայստեր՝ Արա Ասատուրյան, բեմադրող նկարիչ՝ Վիկտորիա Ռիեդո-Հովհաննիսյան։ Սկիզբը՝ 19:00-ին։ 

Նոյեմբերի 15. Ստեփան Զորյանի «Ցանկապատ» ստեղծագործության հիման վրա ներկայացումը՝ Մկրտիչ Արզումանյանի, Արծրուն Հարությունյանի, Տիգրան Գյուլումյանի, Աստղիկ Աբաջյանի, Կարին Ծատուրյանի, Արուս Գրիգորյանի մասնակցությամբ կարող եք դիտել Հ. Պարոնյանի անվան երաժշտական կոմեդիայի պետական թատրոնում։ Սկիզբը՝ 18:00-ին, տոմսերի արժեքը՝ 3000-12.000 դրամ:

Նոյեմբերի 17. Նոր ֆորմատային ծրագիր՝ Հին Անի մյուզիք հոլլում․ ելույթ կունենան դերասան Սամվել Թոփալյանը եւ երգչուհի Իլոնա Սագիեւան՝ ներկայացնելով պոետիկ եւ երաժշտական հետաքրքիր երեկո։ Սկիզբը՝ 20:00-ին։ Տոմսերի արժեքը՝ 7000, 8000 եւ 9000 դրամ։

Նոյեմբերի 18. Կ. Ստանիսլավսկու անվան դրամատիկական թատրոնը հրավիրում է դիտելու «Կրկեսի Սոսը» հոբելյանական ներկայացումը՝ նվիրված Երեւանյան կրկեսի երկարամյա տնօրեն եւ գեղարվեստական ղեկավար Սոս Պետրոսյանի ծննդյան 75 ամյակին: Ներկայացմանը կմասնակցեն կրկեսի, թատրոնի, էստրադայի հանրահայտ արտիստներ, ինչպես նաեւ՝ աճպարարներ, ակրոբատներ, ուրախ ծաղրածուներ եւ կրկեսային այլ ժանրի արտիստներ: Ներկայացումը վարում է Երեւանյան կրկեսի գլխավոր ռեժիսոր Նաիրա Պետրոսյանը, բեմադրիչը Հրաչ Պետրոսյանն է։ Սկիզբը՝ ժամը 14:00-ին:

Նոյեմբերի 19. «Երեւան» կայարանից մինչեւ «Արարատ» եւ հակառակ ուղղությամբ․ մանուկներին սպասվում է 2,5 ժամ տեւողությամբ կախարդական ճանապարհորդություն՝ սիրելի հերոսների ուղեկցությամբ։  Ուղեւորության ողջ ընթացքում նախատեսվում է հսկայական ժամանցային ծրագիր՝ զարմանալի եւ կախարդական մթնոլորտում։ «Волшебный экспресс»-ի մեկնարկը կիրակի օրը՝ 13:30-ին՝ «Սասունցի Դավիթ» կայարանից։ Մեկ հոգու համար նախատեսված տոմսն արժե 12.000 դրամ։