«Երեւանյան հեռանկարներ» 24-րդ միջազգային երաժշտական փառատոնի աշնանային համերգաշարի շրջանակում կիրակի օրը՝ նոյեմբերի 12-ին, Արամ Խաչատրյան համերգասրահում առաջին անգամ Հայաստանում ելույթ ունեցան աշխարհահռչակ տենոր Ռոլանդո Վիլլասոնը եւ տավիղահար Քսավիեր դե Մեստղը:
Երաժիշտները հայ հանդիսատեսին ներկայացան «Լատինական սերենադ» ծրագրով, որն ընդունվեց հայկական ջերմությամբ ու բուռն ծափահարություններով։
Ռոլանդո Վիլլասոնն իր սերնդի ամենապահանջված կատարողներից մեկն է, որն այսօր դասվում է աշխարհի լավագույն տենորների շարքում: Նա թողարկել է ավելի քան 20 ձայնասկավառակ եւ տեսասկավառակ, ամբողջ աշխարհում վաճառել ավելի քան 2 միլիոն ալբոմ, որոնք արժանացել են բազմաթիվ մրցանակների: Ռոլանդո Վիլլասոնը շատ հաճախ համագործակցում է աշխարհի առաջատար նվագախմբերի եւ դիրիժորների հետ, այդ թվին են պատկանում իր բազմաթիվ ելույթները Դանիել Բարենբոյմի եւ Յաննիք Նեզե-Սեգենի հետ:
Հայտնի երաժիշտների երեւանյան ելույթի մանրամասները ներկայացնում ենք լուսանկարներով։