«Ինձանից ավել»․ Սիրուշոն ներկայացրել է սպասված տեսահոլովակն ու զուգերգը պարագվայցի հայտնի երգչի հետ (VIDEO)
11:35 20 նոյեմբերի, 2023Մի քանի օր երկրպագուներին ինտրիգների ու սպասումների մեջ պահելուց հետո Սիրուշոն ներկայացրել է «Ինձանից ավել» երգի ամբողջական տարբերակն ու տեսահոլովակը։ Մինչ թողարկումը երգի հայտնի հատվածն արդեն հասցրել էր շրջանառվել Instagram-ում ու TikTok-ում՝ դառնալով վերջին շրջանում օգտատերերի տեսանյութերի ամենատարածված հնչյուններից մեկը։ Սիրուշոյի ինստագրամյան էջում տեղադրված երգի անոնսային տարբերակը մեկ օրում գրանցել էր մեկ միլիոնից ավելի դիտում։
«Ինձանից ավել» երգը զուգերգ է հայտնի պարագվայցի երաժիշտ եւ երգիչ Վիկտոր Էսպինոլայի հետ։ Իսպանահայկական երգն ունի նաեւ իսպաներեն վերնագիր՝ Un Millon de Flores: Տեսահոլովակում Սիրուշոն երեք շլացնող կերպարներում է։ Երգչուհու առաջին զգեստը սպիտակ է՝ հուլունքներով ու փետուրներով զարդարված, այնուհետեւ նա փայլում է իսպանական ոճում՝ կարմիր զգեստով ու ծաղկանախշ գլխազարդով, իսկ որպես եզրափակիչ կերպար՝ ընտրել է երկնագույն երանգի զգեստ՝ հունական ոճում։ Սիրուշոն համագործակցել է ամերիկահայ դիմահարդար Հրուշ Աճեմյանի հետ, որը աշխատում է նաեւ Քարդաշյանների հետ։ Տեսահոլովակում կտեսնեք նաեւ հայտնի կոմպոզիտոր Արմեն Մարտիրոսյանին։
«Ես գրել եմ իմ հատվածի խոսքերն ու երաժշտությունը, Վիկտոր Էսպինոլան՝ իր, ու այսպիսով ստացվել է մշակույթների ձուլում: Վիկտորը աշխարհի լավագույն քնարահարներից է եւ նվագում է համաշխարհային լավագույն երաժիշտների հետ: Շնորհակալ եմ իրեն այս համագործակցության առաջարկի համար»,-Instagram-ում գրել է Սիրուշոն։