Հայաստանում հրեական համայնքը նշել է Հանուկա տոնն ու «Մենորա» կենտրոնի 20-ամյակը. ֆոտոռեպորտաժ

11:04, 23 դեկտեմբերի

Դեկտեմբերի 22-ին՝ հրեաների Հանուկա տոնի յոթերորդ օրը, Հայաստանում հրեական՝ «Մենորա» մշակութային կենտրոնը, տոնեց իր հիմնադրման 20-ամյակը:

Այդ առիթով կազմակերպված երեկոյին ներկա է եղել նաեւ NEWS.am STYLE-ը եւ ֆիքսել միջոցառման ամենահիշարժան պահերը: «Մենորայի» 20-ամյակին նվիրված երեկոյի հանդիսավոր բացումը տրվեց «Սիրո երգ» հոլովակի պրեմիերայով, որը ռեժիսոր Տիգրան Խզմալյանը նկարահանել է կոմպոզիտոր Վիլլի Վայների ստեղծագործության հիման վրա:

Միջոցառմանը ողջույնի խոսքով հանդես եկան ՀՀ նախագահի աշխատակազմի՝ ազգային փոքրամասնությունների հարցերով ներկայացուցիչ Նարինե Գուլյանը եւ ՀՀ մշակույթի նախարարության՝ ժամանակակից արվեստի բաժնի ղեկավարի տեղակալ Արամ Գյուրջանը: Վերջինս նախարարության կողմից ոսկե մեդալով պարգեւատրեց Վիլլի Վայներին:

NEWS.am STYLE-ի հետ զրույցում Վիլլի Վայներն ասաց, որ սա իր համար բացարձակ տոն էր՝ լի խաղաղությամբ եւ բարությամբ: «Հրաշալի ներկայացվեց այն ամենը, ինչը կապված է մեր անցած ուղու հետ: Այսօր շրջապատված էինք ամենահարազատ մարդկանցով, որոնց հետ մենք հույս ունենք այդ ուղին շարունակել: Իսկապես երեւանյան տոն ստացվեց, քանի որ նախեւառաջ մենք բոլորս երեւանցի ենք, իսկ երեւանցի հասկացողությունը չի ճանաչում ոչ մի ազգություն: Դա որակ է, որ մարդ կամ ունի կամ չունի»,-ասաց նա:

Խոսելով նախարարության կողմից արժանացած մեդալի մասին, կոմպոզիտորն ասաց, որ դա իր համար իսկապես անակնկալ էր:

«Սրտատրոփ էր այն պահը, երբ զգացի, որ դա ուղղակի շնորհակալգիր չէ: Իհարկե, շատ լավ զգացի ինձ այդ պահին: Մշակույթի նախարարությունը շատ ուշադիր է մեր հանդեպ, ինչի համար ես շատ շնորհակալ եմ: Մենք իրոք սպասում ենք դրան, քանի որ երբ գնահատվում ես, ուզում ես շարունակել, որովհետեւ միշտ առջեւում մի այլ լույս է ծագում, որի դու պետք է հասնես»:

«Մենորայի» 20-ամյակի միջոցառմանը ներկա էին նաեւ ԵԱՀԿ երեւանյան գրասենյակի ղեկավար, դեսպան Ալեքսանդր Սորոկինը, կոմպոզիտոր, դիրիժոր Երվանդ Երզնկյանը եւ շատ այլ պատվավոր հյուրեր: Իրենց կատարումները ներկաներին նվիրեցին Երեւանի պետական կամերային խոռի երգիչները եւ դաշնակահար Հայկ Մելիքյանը: