Իվետա Մուկուչյանը՝ գերմանական «The Voice»-ում չհաղթելու եւ ընկերասեր լինելու մասին

14:11   14 մայիսի, 2016

Մայիսի 11-ին միայն եվրատեսիլյան նորություններ լուսաբանող Wiwibloggs կայքը հատուկ երեկույթ էր կազմակերպել Ստոկհոլմի Hard Rock սրճարանում, որտեղ հրավիրված էին մրցույթի մասնակիցներից մի քանիսը։ Հայաստանի պատվիրակ Իվետա Մուկուչյանը, որն այդ նույն կայքում հայտարարված քվեարկության արդյունքում ճանաչվել է Eurovision Next Top Model 2016, նույնպես ներկա է եղել եւ հյուրերի համար կատարել իր «LoveWave» ստեղծագործության էթնո-ջազային cover տարբերակը։

Սակայն մինչ սրճարան մտնելը Իվետան հարցազրույց է տվել կայքի թղթակիցներ Դենիսին՝ պատասխանելով նրա մի քանի հարցերին։

Սկզբում Դենիսը ներկայացրել է Իվետայի անցած ուղին՝ նշելով նրա մասնակցությունը տարբեր մրցույթներին եւ հետաքրքրվել, թե ինչու նման հրաշալի ձայն ունեցող երգչուհին  չհաղթեց գերմանական «The Voice»-ը 2012-ին։

«Հավանաբար հաղթանակի համար ճիշտ ժամանակը չէր, բայց դա շատ մեծ փորձ էր ինձ համար։ Միգուցե այս անգամ»,- ասել է Իվետան։

Դենիսը նաեւ պատմել է, թե որքան ընկերասեր եւ մարդամոտ է Իվետան՝ ավելացնելով, որ կիսաեզրափակիչ փուլի ժամանակ երգչուհին շփվել եւ ընկերացել է բոլորի հետ.

«Գիտեք, օրվա վերջում հիշարժան պահերն են քեզ մնում։ Ինչու խուսափել նման հիանալի մարդկանց, արտիստների հետ հաճելի ակնթարթներ անցկացնելուց։ Նրանք բոլորը յուրահատուկ են, տաղանդավոր, եւ ես ուրախ եմ, որ նման մարդկանց հետ նույն բեմում եմ երգում»,- խոսքը եզրափակել է Իվետան։

Պատրաստեց՝ Յանա



© NEWS.am STYLE