10 միլիոն դոլար՝ Dolby Theatre-ի վարձակալության եւ Լեդի Գագայի մասնակցության համար. նոր մանրամասներ՝ հայ օլիգարխի որդու հարսանիքից
15:04 3 հուլիսի, 2017Երեկ Լոս Անջելեսում ամուսնացել են խոշոր գործարար Էլդար Օսմանովի դուստրը՝ Լոլիտան (արմատներով՝ Կաբարդինո Բալկարիայից) եւ ոչ պակաս խոշոր գործարար Ալբերտ Ավդալյանի որդին՝ Գասպարը։ Հարսանեկան արարողությունը տեղի է ունեցել Dolby Theatre-ում։ Ի դեպ, այստեղ է տեղի ունենում «Օսկար»-ի ամենամյա մրցանակաբաշխությունը։
Լոլիտան ներկայացել է Zuhair Murad-ի հեղինակած զգեստով։
Հարսանիքը վարել են Քսենյա Սոբչակն ու Անդրեյ Մալախովը։ Հյուրերին զվարճացրել են Սվետլանա Լոբոդան, Նիկոլայ Բասկովը, Ստաս Միխայլովն ու Լեդի Գագան։
Հյուրերի թվում էր նաեւ Ռուբեն Վարդանյանը։
Հարսանիքի վերաբերյալ նոր մանրամասներ են ի հայտ եկել:
«Сплетник»-ը գրում է, որ Լոս Անջելեսում Dolby Theatre-ի վարձակալության, ինչպես նաեւ նշված աստղերին հրավիրելու համար տասը միլիոն դոլար է ծախսվել (պարզ է, որ ամենաշատը բաժին է ընկել Լեդի Գագային)։ Ի դեպ, բացի Գագայից, հարսանիքի ժամանակ երգել է նաեւ Ջեյսոն Դերուլոն։
Ֆլորիստների ծառայության համար շուրջ կես միլիոն դոլար են ծախսել։ Սակայն դրանում ներառված չէ ծաղիկների արժեքը։
Ի դեպ, Ավդալյանի կարողությունը, Forbes-ի տվյալներով, 800 մլն դոլար է գնահատվում։ Օսմանովի կապիտալի վերաբերյալ տվյալներ չի հաջողվել գտնել։
Ավանդական հրավիրատոմսերի փոխարեն Գասպարի եւ Լոլիտայի հարսանիքին հյուրերին սեւ ճամպրուկներ են ուղարկել, որոնցում եղել են «Օսկար»-ի արձանիկ, գրիչ, խաղային ֆիշկաներ եւ ոսկեզօծ սկավառակներ՝ նորապսակների անուններով։
Ճամպրուկում նաեւ տեսաուղերձ է եղել, որտեղ նշվել են հարսանեկան արարողության օրն ու վայրը։