Հիսուս Քրիստոսի Հարության տոնը, որը ժողովրդի մեջ առավել հայտնի է որպես Սուրբ Զատիկ, այս տարի նշվում է ապրիլի 20-ին: Տոնին նախորդում է Մեծ Պահքի շրջանը, որը տեւում է 48 օր: Այս տարի Պահք պետք է պահել մարտի 3-ից:

Պահքի շրջանում օգտագործում են բացառապես բուսական ծագում ունեցող սննդամթերք. մրգեր, բանջարեղեն, հատիկավորներ: Մսամթերքից եւ կենդանական ծագում ունեցող այլ մթերքներից` օրինակ ձու, կենդանական յուղ, կաթնամթերք, պետք է հրաժարվել: Մեծ Պահքի շրջանում չի կարելի է նաեւ ալկոհոլ օգտագործել:

Եկեղեցին պնդում է. Պահքը չի սահմանափակվում միայն կենդանական սննդից հրաժարումով: Այն առաջին հերթին հոգեկան ու բարոյական տարատեսակ ախտերից ու մոլություններից, մեղանչական մտքերից, խոսքերից ու գործերից մաքրվելն է, զղջմամբ ու ապաշխարությամբ աստվածահաճո եւ առաքինի կյանքին դառնալը:

Մեծ պահքն ապաշխարության շրջան է, որի ընթացքում կենդանական ծագում ունեցող կերակուրներից հրաժարվում ենք կամ ծոմ պահում այն նպատակով, որ վարժվենք մեղքից հրաժարվելուն: Որովհետեւ խնդիրը ոչ թե ուտելու կամ չուտելու մեջ է, այլ մեր կրքերը զպսելու: Դրա համար, սովին համբերելով, կարողանում ենք ամրություն ձեռք բերել՝ մեղքը հաղթելու համար: Սա նշանակում է, որ ինչ-որ կերակուրներից հրաժարվելը բավական չէ, այլ պետք է փոքր-ինչ քաղցած մնալ. նույնիսկ եթե միայն բուսական կերակուր ուտեք, բայց կշտանաք, այդ նույնպես պահք չի համարվի:

Հետևեք NEWS.am STYLE-ին Facebook-ում, Twitter-ում և Instagram-ում