Դերասան, ռեժիսոր եւ «Համայնքային կազմակերպված օգնության ջանքերի» (CORE) կազմակերպության հիմնադիր Շոն Փենը կպարգեւատրվի Bob Hope մարդասիրական մրցանակով՝ Ակադեմիայի հեռուստատեսության Փառքի սրահում կայանալիք միջոցառման ժամանակ, հայտնում է The Hollywood reporter-ը։

Միջոցառումը, որն անցկացվում է Հեռուստատեսության ակադեմիայի կենտրոնակայանում՝ Հյուսիսային Հոլիվուդի Սաբան մեդիա կենտրոնում, Փառքի սրահում նոր անդամների ընդունման արարողությունն է:

Այս տարի կենտրոնը վեց նոր անդամ կունենա, այդ թվում՝ Դեբի Ալենը, Քեն Բերնսը, Բոբ Դեյլին, Ռոբերտ Լ. Ջոնսոնը, Ռիտա Մորենոն եւ Դոնալդ Ա. Մորգանը: Փառքի սրահը մեծարում է լեգենդներին, «ովքեր իրենց կարիերայի ընթացքում կա՛մ բացառիկ նվաճումների շնորհիվ ակնառու ներդրում են ունեցել արվեստի եւ գիտության կա՛մ հեռուստատեսության կառավարման ոլորտում»:

Ինչ վերաբերում է Փենին, ապա նա առանձնանում է «տասնամյակների իր գործունեությամբ»՝ հիմնականում CORE-ի միջոցով կատարած աշխատանքի շնորհիվ։ Կազմակերպությունը սկսել է գործել 2010 թվականին Հաիթիում տեղի ունեցած ավերիչ երկրաշարժից հետո։ Այդ ժամանակից ի վեր CORE-ը մոբիլիզացվել է մարդասիրական արտակարգ իրավիճակների համար, ինչպիսիք են COVID-19 համաճարակը եւ 2022 թվականին Ուկրաինայում տիրող իրավիճակը:

Bob Hope մարդասիրական մրցանակը հիմնադրվել է 2002 թվականին՝ «պարգեւատրելու անհատին, ում բարեգործական ջանքերը ցույց են տալիս Բոբ Հոուփի տարիների ալտրուիզմը եւ դրական ազդեցությունը հասարակության վրա»: Այս տարի ընտրող հանձնաժողովը գլխավորում էին Հեռուստատեսության ակադեմիայի կառավարիչներ Քիմ Քոլմանը եւ Մայքլ Սփիլլերը։ Պագեւը Հեռուստատեսության ակադեմիայի Կառավարիչների խորհրդի կողմից տրված բարձրագույն պարգեւներից մեկն է։

Հետևեք NEWS.am STYLE-ին Facebook-ում, Twitter-ում և Instagram-ում