Սեւ կատակերգություն՝ ապրելու կարեւորության մասին. «Սեւազգեստ կանայք» ֆիլմի փակ դիտումը` Երեւանում

Կարմիր գորգ. հայտնիների look-երը` «Սեւազգեստ կանայք» ֆիլմի պրեմիերային

ՇոկTok. «Հորս կարիքն այլեւս չեմ զգում». տիկտոկեր Նանո

Ֆոտովլոգ Արսեն Սարգսյանի հետ. խելահեղ Նյու Յորք

ՇոկTok. «Շատերն են թիկունքիցս հարվածել». տիկտոկեր Մանե (man_go)

BACKSTAGE. Ինչպես են ընթանում «Բոլոլա» սիթքոմի նկարահանումները

ՇոկTok. «Երբեք չեմ ցանկանա տղա լինել». տիկտոկեր Արմինե (@poso)

«Stylish Faces». Հայաստանում ԵՄ պատվիրակության ղեկավար, դեսպան Անդրեա Վիկտորին

Հայտնիների կենդանիները. Դայանա Դավթյանի շնիկը՝ Վիննին, եւ ինչ է պահել «Միսս Տիեզերք Արմենիա 2019» ճանաչված գեղեցկուհին նրանից առաջ

ՇոկTok. «Համբույրի տեսարանի պատճառով հրաժարվել եմ նոր նախագծում նկարահանվել». Լիլիա Վարդանյան

Հայտնիների կենդանիները․ Սյուզաննա Մելքոնյանի կատվիկը, որին երգչուհին տվել է իր սիրելի արտիստի անունը

ՇոկTok. Իրինա Այվազյանը` կարոտի եւ որոշ ժամանակ սոցցանցերից ջնջվելու մասին

Yerevan Fashion Week-ի առաջին օրվա մանրամասները՝ NEWS.am STYLE-ի ռեպորտաժում

«Stylish faces». օծանելիքի փորձագետ Բոգդան Զիրյանովը՝ Հայաստանի բույրերի մասին

ՇոկTok. «Հորս սպանել են, երբ 15 տարեկան էի». տիկտոկեր Աշոտ (@ashayvi)

ՇոկTok. Տիկտոկեր Լոլան` առողջական խնդրի,«Հումորի լիգա»-ում կատարված սկանդալի ու հոր  բացակայության մասին

HAUSER-ը ժամանել է Երեւան․ երաժշտի տրամադրությունը՝ «Զվարթնոց» օդանավակայանում

Նիգերիացի բլոգեր Shady Shae-ն փորձում է գուշակել հայերեն բառեր

«Փլուզման եզրին էինք»․ Վանը՝ Nemra-ի սպասվող համերգի անակնկալների, 11 թվի ու խմբի ամենածանր փուլի մասին (ֆոտո/վիդեո)

12:05, 9 փետրվարի

Nemra-ն 11 տարեկան է։ Խմբի համար խորհրդանշական այս թիվը, բնականաբար, նշվելու է նեմՌացիների հետ՝ հատուկ էներգետիկայով ու էմոցիաներով։ Ռոք խմբի հոբելյանական համերգը կայանալու է փետրվարի 24-ին՝ «Պլատֆորմ»-ում։ Վոկալիստ ու կիթառահար Վան Եղիազարյանը վստահեցնում է՝ երկրպագուները Nemra-ին կտեսնեն` ինչպես հին ու հարազատ վիճակներում, այնպես էլ կբացահայտեն նորովի։ 

Հույզեր՝ բեմում ու բեմից դուրս, տարիների ամրություն, դժվարություններ, հաղթահարում եւ, իհարկե, սպասված հանդիպում․․․ NEWS.am STYLE-ը խմբի 11-ամյակի առթիվ զրուցել է Վանի հետ։ 

265247100_136791092065530_9216950059466786041_n.jpg (73 KB)

11-ը «Նեմրա»-ի համար, կարծես, խորհրդանշական թիվ է, նույնիսկ, երգ ունեք՝ Room N11. այս հատուկ թվով հոբելյանն ինչպե՞ս եք պատրաստվում նշել:

11 թիվը մեր կյանքում ամենագլխավոր թիվն է, շատ զուգադիպություններ են եղել դրա հետ կապված, եւ անընդհատ այդ թվի տեսքով նշաններ ենք ստանում։ Նաեւ այդ ամենը հաշվի առնելով՝ մեր բոլոր ալբոմների երգերի քանակը 11 է։ Համերգը սկսելու ենք մեր երկրորդ ալբոմի առաջին երգով՝ Room N11, որպես մեր 11 ամյակի խորհրդանիշ: Մեր ամենասիրելի նշելու ձեւը մեր լսարանին մի վայրում հավաքելն ու նրանց հետ միասին երգելն է։ Պատրաստվում ենք հիանալի ժամանակ անցկացնել միասին փետրվարի 24-ին՝ «Պլատֆորմ»-ում, հիանալի ձայնային ու լուսային՝ 2,5 ժամանոց համերգով։ Մարդկանց հետ փոխանակվելու ենք էներգիաներով։

Ինչպես խոստացել եք, լինելու են նաեւ անակնկալներ։ Ի՞նչ ծրագիր է սպասվում հանդիսատեսին։ 

Համերգին հնչելու են մեր առաջին, երկրորդ ալբոմներից երգեր, գալիք ալբոմից արդեն հայտնի, սիրված սինգլները, հայկական ժողովրդական երգերի մեր հայտնի մշակումները։ նվագելու ենք նաեւ մի «լքված» երգ մեր առաջին ալբոմից, որը մեր հանդիսատեսը շատ է սիրում, որը, սակայն, մենք վերջին տարիներին չենք կատարում, քանի որ ես «թարսվել էի» այդ երգի հետ, չէի զգում․․․ Բայց հիմա այն վերաիմաստավորվել է ու մեծ հաճույքով եմ կատարելու։ Չեմ ուզում ասել՝ որ երգի մասին է խոսքը, համերգի ժամանակ նեմռացիները կհասկանան։ Իսկ ամենագլխավոր անակնկալը նոր երգն է․ այն ամբողջովին տարբերվում է մեր նախորդ երգերից, գուցե, մի քիչ վախեցնի մեր լսարանին․ մտածելու են, որ վերջ, էլ չի լինելու այն հին, բարի ու ռոմանտիկ Nemra-ն, բայց շտապեմ հանգստացնել ու ասել, որ հաջորդ ալբոմում շատ կան մեղեդային, իմաստային ու նուրբ երգեր, որոնք հետո կներկայացնենք։ Իսկ այս նոր երգը պոռթկում է, եւ կարծում եմ՝ շատերին մեր այս երաժշտական ուղղվածությունը, նույնպես, դուր է գալու։ Հուսով եմ՝ երգի կատարման ընթացքում կմիանան մեզ։

287409864_559596555527324_8125978233337411127_n.jpg (282 KB)

Վան, համերգներ, առհասարակ, շատ եք ունենում․ ինչո՞վ են ձեզ համար առանձնանում հոբելյանական համերգները՝ հուզմունքի եւ սպասումի տեսանկյունից:

Հոբելյանական համերգներն առանձնահատուկ են նրանով, որ հիշողությունների գիրկն ենք ընկնում, հիշում ենք մեր անցած ճանապարհը, ամփոփում նախորդ տարիների ստեղծածը․ շատ հուզիչ զգացողություն է վերհիշել, թե որտեղից որտեղ ենք հասել․․․ Երկակի զգացողություն է, մեկ՝ թվում է, թե անհնարինին ենք հասել, երբեմն էլ՝ թե պետք էր ավելիին հասնել։ Բայց երբ բարձրանում ես բեմ, արդեն այդ ամենը երկրորդական հարցեր են․ այնտեղ ամեն ինչ ճիշտ է եւ ժամանակին։

276295882_507436334076680_5817126548663747595_n.jpg (288 KB)

Հայաստանում խմբերը, ցավոք, երկար տարիների կյանք չեն ունենում։ Ո՞րն է ձեր համախմբվածության գրավականը։ Ազգակցական կապերն այս դեպքում դեր ունե՞ն (Մարեկը Մարիաննայի եղբայրն է, Վանն ու Վասպուրը եղբայրներ են)։

Ինչքան էլ ասենք, որ մեր խումբն ամուր է մնում զուտ ազգակցական կապերի շնորհիվ, կարծում եմ՝ գլխավոր պատճառը երգերն են։ Մենք սիրում ենք այն, ինչ անում ենք, խմբի ներսում հարմոնիա կա, առողջ մթնոլորտ է, եւ բոլորս սիրում ենք մեր առաքելությունն այս խմբում։ Իհարկե, եթե մեր հանդիսատեսը չլիներ, ինչքան էլ սիրեինք մեր ստեղծածը, անիմաստ կլիներ բեմ բարձրանալը։ Իսկ քանի դեռ մեր ներքին էներգիան մաքուր է, մեր ու հանդիսատեսի միջեւ էներգիան եւս մաքուր է։ Մեծ սիրով շարունակում ենք՝ անկախ դժվարություններից, որոնք անցողիկ են։

305843932_192455979832374_1894777576802260240_n.jpg (503 KB)

Այնուամենայնիվ, այս 11 տարիների ընթացքում եղե՞լ է այնպես, որ Nemra-ն կանգնի փլուզման եզրին։ Ինչպե՞ս եք հաղթահարել այդ փուլը: 

Ամենածանր պահը եղել է սկզբում, երբ առաջին 2-3 տարիներից հետո մենք անհամաձայնություններ ունեցանք մեր նախորդ հարվածային գործիքներ նվագողի հետ, ում հետ զրոյից ստեղծել էինք խումբը եւ ունեինք նաեւ ընկերական հարաբերություններ։ Շատ ծանր փուլ անցանք, խումբը կարելի է ասել փլուզման եզրին էր։ Իհարկե, ենթագիտակցորեն մենք գիտեինք, որ այդքան նոր երգերը անհնար եւ անարդար կլիներ չձայնագրելը, շարունակում էինք ձայնագրել, բայց համերգների տրամադրություն բացարձակ չունեինք։ Այդ պահին թվում էր՝ ամեն ինչ անիմաստ է, եւ մեծ հիասթափություն էինք ապրում։ Բայց հետո, երբ առաջին ալբոմը թողարկեցինք, հասկացանք, որ չենք կարող կտրվել այս ամենից։ Տարբեր հարվածային գործիքներ նվագողների հետ համերգներ ունեցանք, մինչեւ մեր հիմնական չորրորդը (Մարեկը) հայտնվեց 2015-ին, ու արդեն ամեն ինչ տեղն ընկավ։

279623355_536028464550800_782500938828229176_n.jpg (931 KB)

Հաճախ կիսվում ես նաեւ անհատական կատարումներով: Խմբին զուգահեռ՝ մեներգչի կարիերայի մասին մտածո՞ւմ ես, թե՞ այդ գործունեությունդ կարտահայտվի միայն cover-ների տեսքով:

Անհատական կատարումներս զուտ հոբբիի նման են ինձ համար, ուղղակի հաճելի է լրիվ ոչ պրոֆեսիոնալ ձայնագրությամբ, տանը նվագել երգելով, հեռախոսով ձայնագրել ու կիսվել հանդիսատեսի հետ հենց այդ պահի անկեղծ զգացողություններով՝ առանց արհեստական որեւէ բանի։ Որոշ այդպիսի տնային cover կատարումներ, իհարկե, շատ հայտնի դարձան, մանավանդ, երբ կատարեցի իմ ամենասիրելի հայ երգահանի՝ Ռուբեն Հախվերդյանի երգերից երկուսը, ու շատ ուրախ եմ, որ մարդիկ հավանել են, քանի որ Հախվերդյանի երգերը ես միայն սիրում եմ իր կատարմամբ։ Երբ ուրիշները երգում էին նրա երգերից, միշտ մտածում էի՝ աղավաղում են․ հիմա, եթե ես ինձ կողքից նայեի, երեւի էլի այդպես կմտածեի (ծիծաղում է)։ Բայց ես, ուղղակի, վայելում եմ երգը կատարելու ընթացքն ու առաձնապես չեմ մտածում հավանողների մասին: 

Մեներգչի կարիերայի մասին չեմ մտածում, քանի որ ես Nemra-ում անում եմ այն ամենը, ինչ ուզում եմ․ չկա որեւէ սահմանափակում։ Դրանով բոլորիս բախտը բերել է․ մեր մոտեցումները նույնն են, ու ոչ ոք խմբում չի կաշկանդվում անել այն, ինչ ուզում է։ Չկա ոճային սահմանափակում, մենք անում ենք այն, ինչ սիրում ենք, ու մեզ հետաքրքիր չէ, թե «Առնեմ-ելնեմ» երգը ինչքան տարբեր է Help Me Forget-ից, Connection Lost-ը` «Նարե»-ից․․․ Այդ ամբողջը մենք ենք․ դեռ երբեք չենք դավաճանել մեզ, արել մի բան, ինչ չենք սիրում՝ հանուն նրա, որ մեզ ավելի շատ հարսանիքների կանչեն։ Բարեբախտաբար, մարդիկ ցանկանում են մեզ տեսնել ամենուր՝ սիրելով այն, ինչ անում ենք, ինչը մեզ հնարավորություն է տալիս շարունակել, ստեղծել նոր երգեր ու տեսահոլովակներ։

Օրերս նոր տեսահոլովակ թողարկեցիք՝ If You Go երգի հիման վրա․ ի՞նչ սպասել խմբից 2023-ին:

Արդեն սկսել ենք նախօրոք չասել, թե ինչ սպասել, որովհետեւ մենք այն «բախտավոր» խմբերից ենք, որոնց ամենաակտիվ շրջանում աշխարհը գլխիվայր շուռ է գալիս, էլ չասեմ, թե Հայաստանում ինչեր են կատարվում։ Մենք ունենք շատ նոր երգեր, որոնք, կարծում ենք, մեր նախորդ երգերից ավելի շատ են սիրվելու։ Հերթով ձայնագրելու ենք, տեսահոլովակներ ենք նկարահանելու, ունենալու ենք համերգներ՝ տարբեր քաղաքներում եւ երկրներում․․․ Բայց ժամկետների մասին արդեն չենք խոսում, քանի որ ամեն ինչ անկանխատեսելի է մեր ժամանակներում։ Հուսով եմ՝ քաոսը շուտ կանցնի ու, վերջապես, հանգիստ կվայելենք մեզ տրված ժամանակաշրջանը։

Սյունե Առաքելյան
Լուսանկարները՝ Վանի ու Nemra-ի ֆեյսբուքյան էջերից


Հետևեք NEWS.am STYLE-ին Facebook-ում, Twitter-ում և Instagram-ում





  • Այս թեմայով

TV SHOWS PHOTO VIDEO


@NEWSam_STYLE

  • Արխիվ
Որոնել
  • Հարցում
Քվեարկել են (9)  |  Այլ հարցում