• Անժամանակյա դասականները նոր մեկնաբանություններով. Երևանը հյուրընկալում է 18-րդ Շեքսպիրյան փառատոնը

  Ավելի քան չորս դարերի պատմություններ կրկին կկենդանանան երևանյան բեմում, քանի որ նոյեմբերի 4-ին մայրաքաղաքում կբացվի Շեքսպիրյան 18-րդ միջազգային թատերական փառատոնը…

• «Հայկական գինու շաբաթ». նախաձեռնություն, որը խրախուսում է աշխարհի տարբեր ծայրերում գտնվող հայերին դառնալ իրենց ազգային գինեգործության դեսպանները

  Նոյեմբերի 8-ից 14-ը Հայաստանում կանցկացվի «Հայկական գինու շաբաթ» նախաձեռնությունը, որը յուրաքանչյուր հայի հրավիրում է դառնալ ազգային գինեգործության դեսպան…

• ReAnimania-ն 18 տարեկան է․ միջազգային փառատոնն ընդլայնում է ծրագիրն ու հանդես գալիս նոր նախագծերով

  Նոյեմբերի 7-ից 14-ը Երևանը կրկին կհյուրընկալի աշխարհի տարբեր երկրներից ժամանած անիմատորների, նկարիչների և վիզուալ արվեստի սիրահարների…

• Կենդանի զեբր, սև խավիար և կենդանիների կերպարներով հյուրեր․ Դոնալդ Թրամփը Մար-ա-Լագոյի իր նստավայրում «Վայրի ջունգլիներ» թեմատիկ երեկույթ է կազմակերպել

  Դոնալդ Թրամփը որոշել է Հելոուինը նշել մեծ շուքով։ ԱՄՆ նախագահն իր՝ Ֆլորիդայի Մար-ա-Լագո նստավայրում թեմատիկ երեկույթ է կազմակերպել՝ տոնը վերածելով իսկական աշխարհիկ շքահանդեսի…

• Նկարիչը թանգարանի անվտանգության աշխատակիցների ուշադրությունը շեղել է անպարկեշտ ձայների միջոցով, որպեսզի գաղտնի կերպով կախի Met Gala-ն քննադատող իր նկարը

  Մինչ աստղերը երազում են հայտնվել Met Gala-ի հյուրերի շարքում, նկարիչ Դեյվիդ Սեբաստիանը որոշել է միջոցառման պատմության մեջ իր անունը թողնել բոլորովին այլ կերպ…

• Մարդիկ կան՝ վատ բաներ են մեր հետևից ասում, մարդիկ կան՝ ուրախանում են. Հելոուինը` Հայաստանում

  Հայաստանում Հելոուինը տարեցտարի ավելի նկատելի ներկայություն է ձեռք բերում…

• Թրամփի ինքնագրով շոկոլադ և Սպիտակ տան վրայով թռչող ինքնաթիռ․ ինչով զարմացրեց Սպիտակ տան Հելոուինը

  Սպիտակ տանը հյուրերին բաժանել են Դոնալդ Թրամփի ինքնագրով շոկոլադներ, նրանց գլխավերևով անցել է նախագահական ինքնաթիռը, իսկ տոնակատարության փոքրիկ մասնակիցների շարքում հայտնվել են խորհրդային տանկիստ և փտած բանան…

• Դուբայում կբացվի աշխարհում առաջին ոսկե հետիոտնային արահետը

  Դուբայը նոր տեսարժան վայր է պատրաստում նրանց համար, ովքեր այս քաղաքը կապում են շքեղության և տպավորիչ ռեկորդների հետ…

Հայաստանի և Բելգիայի միջև մշակութային կապերի ամրապնդմանն ուղղված նոր նախաձեռնության շրջանակում Երևանում է գտնվում աշխարհահռչակ Էլիզաբեթ թագուհու երաժշտական կապելլայի պատվիրակությունը։ Այցի շրջանակում նախատեսված են հանդիպումներ հայաստանյան մշակութային կառույցների ներկայացուցիչների հետ, ինչպես նաև համերգ, որի ընթացքում կներկայացվեն կապելլայի շրջանավարտների ձեռքբերումները և կստեղծվեն նոր համագործակցությունների ու մասնագիտական կապերի հաստատման հնարավորություններ։

ՀՀ-ում Բելգիայի Թագավորության արտակարգ և լիազոր դեսպան Էրիկ Դե Մույնքն ասում է, որ Հայաստանում Բելգիայի դեսպանությունը թեև երիտասարդ կառույց է, սակայն արդեն իսկ ակտիվորեն աշխատում է երկու երկրների միջև կապեր ստեղծելու ուղղությամբ։

«Մենք մեզ հաճախ անվանում ենք «ստարտափ» դեսպանատուն, որովհետև մեր հիմնական նպատակը Հայաստանի և Բելգիայի միջև կամուրջներ կառուցելն է՝ թե՛ հաստատությունների, թե՛ ժողովուրդների, թե՛ երկրների մակարդակով»,-այսօր՝ հունիսի 15-ին կայացած ասուլիսի ժամանակ նշեց դեսպանը։

Նրա խոսքով՝ Հայաստանը հարուստ մշակութային ենթակառուցվածքներ ունի՝ օպերա, համերգասրահներ, թատրոններ և այլ հաստատություններ, և վերջին երկուսուկես տարիների ընթացքում դեսպանությունը հետևողականորեն աշխատել է դրանց և բելգիական գործընկերների միջև համագործակցություն ձևավորելու ուղղությամբ։

Դեսպանը հիշեցրեց նաև Բելգիայում բնակվող մեծաթիվ հայկական համայնքի մասին՝ ընդգծելով, որ ներկայումս երկրում ապրում է շուրջ 30-40 հազար հայ, ինչը լրացուցիչ հիմք է մշակութային և մասնագիտական կապերի զարգացման համար։

Էլիզաբեթ թագուհու երաժշտական կապելլայի գլխավոր գործադիր տնօրեն Գրեգոր Շապելը համագործակցությունը բնութագրեց որպես արդեն գոյություն ունեցող բարեկամության շարունակություն։ Նա հիշեցրեց, որ Բելգիայի թագուհի Էլիզաբեթը մտերիմ հարաբերություններ է ունեցել հայ մեծանուն կոմպոզիտոր Արամ Խաչատրյանի հետ։

«Արամ Խաչատրյանը հաճախ էր այցելում թագուհուն Բելգիա մեկնելիս, նրանք միասին նույնիսկ մասնակցել են ԱՄՆ-ում անցկացվող փառատոների։ Ուստի մեզ համար այս համագործակցությունը նաև պատմական հիմքեր ունի»,- ասաց Շապելը։

Նրա ներկայացմամբ՝ Էլիզաբեթ թագուհու երաժշտական կապելլան համարվում է աշխարհի լավագույն երաժշտական կրթական և մասնագիտական կենտրոններից մեկը։ Այժմ այնտեղ ստեղծագործում և կատարելագործվում են 67 արտիստներ՝ 22 երկրներից։

«Մեր հիմնական նպատակը արվեստում գերազանցության հասնելն է»,- նշեց նա։

Շապելը ներկայացրեց համագործակցության երեք հիմնական ուղղությունները՝ կապելլայի ճանաչելիության բարձրացումը հայկական երաժշտական միջավայրում, գործընկերային հարաբերությունների ձևավորումը նվագախմբերի և մշակութային հարթակների հետ, ինչպես նաև հայկական համայնքի ներգրավումը՝ որպես երիտասարդ երաժիշտների աջակիցների և հովանավորների։

Նրա խոսքով՝ արդեն այսօր նախատեսված է հանդիպում Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանի հետ՝ հնարավոր համագործակցության հեռանկարները քննարկելու նպատակով։

ՀԲԸՄ Հայաստանի մասնաճյուղի նախագահ և կենտրոնական վարչության անդամ Վազգեն Յակուբյանը նշեց, որ նախաձեռնությունը լիովին համահունչ է կազմակերպության առաքելությանը, որը հիմնված է ազգային ինքնության և մշակութային ժառանգության պահպանման վրա։

«Մեր գործունեության չորս հիմնական ուղղություններից երկուսը՝ կրթությունն ու մշակույթը, անմիջականորեն առնչվում են այս համագործակցությանը»,- ասաց Յակուբյանը։

Նրա խոսքով՝ ՀԲԸՄ-ն երկար տարիներ կրթաթոշակներ է տրամադրում տարբեր ոլորտների ներկայացուցիչների, այդ թվում՝ կատարողական արվեստի երիտասարդ մասնագետների համար, իսկ նոր նախաձեռնությունը կարող է լրացուցիչ հնարավորություններ ստեղծել տաղանդավոր հայ երաժիշտների առաջխաղացման համար։

Յակուբյանը նաև ընդգծեց Սփյուռքի դերակատարության փոփոխությունը՝ նշելով, որ այսօր այն այլևս միայն նվիրատու չէ, այլ ակտիվ գործընկեր։

«Հայաստանի և Սփյուռքի միջև կառուցվող կամուրջը պետք է լինի երկկողմանի։ Սփյուռքը պետք է ներդրումներ կատարի Հայաստանում, բայց միաժամանակ ինքն էլ ունի Հայաստանի կարիքը»,- նշեց նա։

Ասուլիսի ընթացքում ներկայացվեցին նաև կապելլայում ընդունվելու պայմանները։ Գրեգոր Շապելի խոսքով՝ դիմորդներից չեն պահանջվում հատուկ փաստաթղթեր կամ դիպլոմներ. հիմնական չափանիշը երաժշտական գերազանցությունն է։

Ցանկացողները կարող են դիմել կապելլայի պաշտոնական կայքի միջոցով՝ ներկայացնելով իրենց կատարումների ձայնագրությունները։ Նախնական ընտրությունից հետո թեկնածուները հրավիրվում են Բելգիա՝ լսումների մասնակցելու, իսկ ընտրվելու դեպքում կապելլան նրանց համար հովանավորներ է գտնում՝ ուսման և մասնագիտական զարգացման ծախսերը հոգալու նպատակով։

Այսպիսով, Երևան կատարած այցը նպատակ ունի ոչ միայն ներկայացնել աշխարհի առաջատար երաժշտական կենտրոններից մեկի գործունեությունը, այլև ստեղծել նոր հնարավորություններ հայ երաժիշտների համար՝ միջազգային մասնագիտական հարթակներում իրենց տեղը գտնելու և Հայաստան-Բելգիա մշակութային կապերն ավելի խորացնելու ուղղությամբ։

Սյունե Առաքելյան

Հետևեք NEWS.am STYLE-ին Facebook-ում, Twitter-ում և Instagram-ում