• Ինչու է մանկական կոսմետիկան դարձել գեղեցկության միտում

  Մեծահասակ աղջիկները կրկին լոգարանից հանում են մանկական քսուքներ, յուղեր և շամպուններ․․․

• K-Beauty-ն նոր մակարդակի է հասնում. Հարավային Կորեան գեղեցկության նոր կանոններ է սահմանում

  Կորեական կոսմետիկան վաղուց դադարել է լինել վիրուսային սոցիալական ցանցերի միտում․․․

• «Սառցե դեմք». Արդյո՞ք սառը թերապիան իսկապես աշխատում է, և ի՞նչ է անում սառույցը ձեր մաշկի հետ

  Սառույցը կրկին դարձել է գեղեցկության հիմնական միջոցառում. աղջիկները դեմքերը թաթախում են սառցե ջրով լի ամանների մեջ, սառած գլանափաթեթներով սրբում մաշկը, դիմակները պահում սառնարանում և կարևոր իրադարձությունից առաջ կատարում են տնական սառցե դեմքի խնամք․․․

• Քնեք տգեղ, արթնացեք գեղեցիկ. ի՞նչ է թաքնված վիրուսային Morning Shed միտման հետևում

  Մինչև վերջերս աղջիկները քնում էին դեմքի կրեմով՝ հույս ունենալով արթնանալ ավելի մեղմ, ավելի խոնավեցված մաշկով․․․

• Էքստրեմալ «ինքդ արա» դարաշրջանը. TikTok-ի միտումներ, որոնք կփչացնեն ձեր մաշկը

  TikTok-ը վաղուց ոչ միայն միտումների աղբյուր է, այլև կասկածելի գեղեցկության խորհուրդների իսկական հանրագիտարան․․․

• 2026 թվականի ամռան 5 լավագույն կոսմետոլոգիական հիթերը

  Ամառը միտումներ է սահմանում ոչ միայն նորաձևության, այլև կոսմետոլոգիայի մեջ․․․

• Գեղեցկության գաղտնիքներ. Ի՞նչ են պեպտիդները և ինչպե՞ս դրանք ճիշտ օգտագործել

  Այս օրերին ինտերնետը լի է մաշկի խնամքի ինքնահռչակ մասնագետներով․․․

• LED դիմակները գրավել են TikTok-ը. լուսային թերապիան իսկապես երիտասարդացնո՞ւմ է մաշկը, թե՞ սա, պարզապես, հերթական «բյութի հայփն է»

  Մինչև վերջերս LED դիմակները թվում էին գիտաֆանտաստիկ ֆիլմերի ռեկվիզիտներ․․․

Մաշկի խնամքը նույնպես վերածվել է հստակ գրաֆիկի. մի երեկո՝ թթուներ, հաջորդը՝ ռետինոլ, հետո՝ երկու օր վերականգնում, և այդպես շարունակ։ Այսպես TikTok-ը հորինեց skin cycling-ը (մաշկի ցիկլավորումը)՝ մի համակարգ, որն առաջարկում է ակտիվ նյութերն օգտագործել ոչ թե միանգամից, այլ հերթագայել ըստ օրերի։

Այս գաղափարը հատկապես գրավիչ դարձավ այն շրջանից հետո, երբ աղջիկները դեմքին միանգամից մի քանի շիճուկ, թթու և ռետինոիդ էին քսում իրար վրայից՝ հուսալով ավելի արագ արդյունք ստանալ։ Բայց մաշկը սովորաբար չի կիսում այդ ոգևորությունը. չափազանց շատ ակտիվ միջոցները մեծացնում են չորության և գրգռվածության վտանգը։ Մաշկաբանները նույնպես խորհուրդ են տալիս չծանրաբեռնել խնամքը և այն հարմարեցնել մաշկի կոնկրետ վիճակին։

Բայց մի նուրբ դրվագ կա. skin cycling-ը բոլորին համապատասխանող բժշկական արձանագրություն չէ։ Դա ավելի շուտ խնամքը կազմակերպելու հարմար սխեմա է, որը կարելի է հարմարեցնել անձամբ քեզ։

Առաջին գիշեր. թթուներ՝ մաշկի փոքրիկ թարմացման համար

Դասական սխեմայով առաջին երեկոյան օգտագործվում են քիմիական էքսֆոլիանտներ (շերտազատող միջոցներ), օրինակ՝ AHA կամ BHA թթուներ պարունակող միջոցներ։ Դրանք օգնում են հեռացնել մահացած բջիջները, հարթեցնել մաշկի կառուցվածքը և պայքարել պիգմենտացիայի ու ցաների որոշ տեսակների դեմ։

Այստեղ գլխավորը «ապակու պես հարթ մաշկի» էֆեկտի չհասնելն է։ Չափազանց հաճախ կամ ագրեսիվ շերտազատումը կարող է հանգեցնել չորության ու գրգռվածության։ Անգամ մաշկաբաններն են խորհուրդ տալիս քիմիական էքսֆոլիանտներն օգտագործել չափավոր՝ ամեն երեկոն չվերածելով տնային պիլինգի։

Ամռան վերջին սա հատկապես արդիական է. եթե մաշկն արդեն շատ արև է ստացել, զգայուն է դարձել կամ ակտիվ հանգստից հետո պիգմենտացիա է առաջացել, ավելի լավ է թթուների հետ ագրեսիվ փորձարկումներ չանել։

Երկրորդ գիշեր. ասպարեզ է դուրս գալիս ռետինոլը

Հաջորդ երեկոն տրամադրում են ռետինոլին կամ տնային խնամքին հարմար որևէ այլ ռետինոիդի։

Սա այն բաղադրիչներից է, որի արդյունավետությունն իսկապես գիտականորեն ապացուցված է. ռետինոիդներն արագացնում են բջիջների նորացումը, օգնում են ակնեի դեպքում և աստիճանաբար բարելավում են մանր կնճիռների տեսքն ու մաշկի կառուցվածքը։ Բայց արագ արդյունքների պետք չէ սպասել. մաշկին ժամանակ է հարկավոր սովորելու համար, իսկ առաջին շաբաթները միանգամայն կարող են ուղեկցվել չորությամբ, կարմրությամբ կամ թեփոտմամբ։

Այդ իսկ պատճառով հայտնի «ամեն երեկո՝ հանուն կատարյալ մաշկի» կարգախոսը վատ ռազմավարություն է սկսնակների համար։ Խորհուրդ է տրվում ռետինոլը սկսել աստիճանաբար, օրինակ՝ շաբաթական մի քանի անգամից՝ հաշվի առնելով մաշկի դիմացկունությունը։

Եվս մեկ կարևոր բան, հատկապես ամռան վերջին. ռետինոիդները կարող են բարձրացնել արևի նկատմամբ մաշկի զգայունությունը, ուստի ցերեկային ժամերին ուլտրամանուշակագույն ճառագայթներից պաշտպանվելը պարտադիր է։

Երկու գիշեր հանգիստ. մաշկին ևս հանգստյան օր է պետք

Թթուներից և ռետինոլից հետո գալիս է skin cycling-ի ամենաթերագնահատված մասը՝ վերականգնումը։

Այս երեկոներին ոչ մի նոր ակտիվ նյութ, փորձարկում և «արդյունքն օր առաջ տեսնելու» ձգտում։ Նուրբ մաքրում, անհրաժեշտության դեպքում՝ խոնավեցնող շիճուկ, և մաշկային պատնեշը պահպանող քսուք. այսքանը լիովին բավական է։ Ակտիվ բաղադրիչների մշտական ազդեցության փոխարեն մաշկը ժամանակ է ստանում վերականգնվելու համար, իսկ դուք վերջապես դադարում եք գլուխ կոտրել, թե հատկապես որ շիճուկն էր գրգռվածություն առաջացրել։

Խոնավեցնող միջոցներն օգնում են նվազեցնել մաշկի խոնավության կորուստը և պահպանել դրա պաշտպանիչ պատնեշը. որպես օգտակար բաղադրիչներ՝ մաշկաբաններն առանձնացնում են, օրինակ, ցերամիդները և հիալուրոնաթթուն։

Ինչու պետք չէ նույնությամբ կրկնօրինակել TikTok-ի օրացույցը

Skin cycling-ը մի խնդիր ունի. համացանցում շատ են սիրում ցանկացած աշխատող գաղափար վերածել ունիվերսալ հրահանգի։ Բայց ակնեով մաշկը, չոր ու զգայուն մաշկը և առանց լուրջ խնդիրների մաշկը երեք միանգամայն տարբեր պատմություններ են։

Եթե նոր եք սկսում օգտագործել ռետինոլ, «թթուներ - ռետինոլ - վերականգնում - վերականգնում» սխեման կարող է չափազանց ինտենսիվ լինել։ Նման դեպքում ավելի խելամիտ կլինի սկզբում շատացնել վերականգնման երեկոները։

Նույնը վերաբերում է թթուներին։ Եթե մաշկն արդեն գրգռված է, թեփոտվում է կամ արևային այրվածք է ստացել, լրացուցիչ ակտիվ նյութերն այժմ բոլորովին պետք չեն։ Նույնիսկ սովորական չորությունը չափազանց շատ շերտազատելուց հետո կարող է տհաճ շղթա սկսել. մարդը տեսնում է թեփոտումը, սկսում է էլ ավելի ուժեղ սկրաբ անել մաշկը ու արդյունքում միայն սրում է գրգռվածությունը։

Եվս մեկ սկզբունք. պետք չէ միանգամից օգտագործել ամեն ինչ։ Եթե ձեր քսուքի մեջ արդեն կա ռետինոլ, շիճուկի մեջ՝ թթուներ, և դուք վրայից ևս մեկ ակտիվ նյութ եք ավելացնում, գրաֆիկն այլևս անիմաստ է դառնում։ Մաշկաբանները խորհուրդ են տալիս հասցնել միջոցների քանակը նվազագույնի և առանց անհրաժեշտության չկրկնել նույն ակտիվ բաղադրիչները։

Երկու շաբաթվա skin cycling. մեղմ կուրս ամռան վերջին

Եթե ուզում եք հիմա փորձել այս համակարգը, ավելի լավ է մաշկի համար տասը ակտիվ նյութերից բաղկացած մարաթոն չկազմակերպել։ Ստորև ներկայացված է 14-օրյա ունիվերսալ խնայող սխեմա՝ առանց ընդգծված մաշկաբանական խնդիրների հասուն մաշկի համար։ Եթե հղի եք կամ կրծքով եք կերակրում, օգտագործում եք մաշկաբանի նշանակած դեղամիջոցներ, ունեք ռոզացեա, էկզեմա կամ խիստ գրգռված մաշկ, ավելի լավ է նման սխեման չսկսել առանց մասնագետի խորհրդատվության։

Կուրսը նախատեսված է երկու շաբաթվա համար։ Առաջին երեկոյան՝ թթուներ, ապա խոնավեցնող քսուք։ Երկրորդին՝ փոքր քանակությամբ ռետինոլ և նորից խոնավեցում։ Եթե մաշկը դեռ ծանոթ չէ ռետինոլին, այս փուլն ավելի լավ է բաց թողնել և դրա հետ ծանոթությունը սկսել աստիճանաբար։

Երրորդ և չորրորդ երեկոները տրամադրում ենք վերականգնմանը. միայն մաքրում, խոնավեցում և քսուք։ Հինգերորդ երեկոյան նորից վերադարձնում ենք թթուները, եթե մաշկը լավ է տարել առաջին փուլը։ Վեցերորդը հանգիստ է։ Յոթերորդ օրը կարելի է վերադառնալ ռետինոլին, եթե այն ձեզ արդեն լավ ծանոթ է։

Երկրորդ շաբաթը կրկնում է նույն սկզբունքը. ութերորդ և իններորդ երեկոներին՝ վերականգնում, տասներորդին՝ թթուներ, տասնմեկերորդին՝ հանգիստ, տասներկուերորդին՝ ռետինոլ, իսկ վերջին երկու երեկոները նորից թողնում ենք մաշկի վերականգնմանը։

Առավոտյան ամեն ինչ շատ ավելի պարզ է՝ նուրբ մաքրում, խոնավեցում և լայն սպեկտրի SPF: Արևապաշտպան միջոցը հատկապես կարևոր է թթուների և ռետինոիդների օգտագործման ժամանակ։

Skin cycling-ի գլխավոր գաղափարը պարզ է. լավ արդյունքի համար պարտադիր չէ, որ ակտիվ նյութերն աշխատեն միաժամանակ։ Երբեմն մաշկի համար իսկապես ավելի օգտակար է դադար տալ, քան դեմքին ևս մեկ միջոց քսել։

Հետևեք NEWS.am STYLE-ին Facebook-ում, Twitter-ում և Instagram-ում