• Իջինը «հպարտացել է» իր սլացիկ կազմվածքով (ֆոտո)

  Ռուսաստանաբնակ երգչուհի Իջինը Instagram-ում նոր հրապարակում է արել՝ ցուցադրելով իր գեղեցիկ արեւայրուքն ու սլացիկ կազմվածքը...

• «Ահա, թե ինչ եմ անում, երբ չեմ աշխատում»․ Սիրուշոն ցուցադրել է, թե ինչպես է անցկացրել «weekend»-ը երեխաների հետ (ֆոտո/վիդեո)

  Սիրուշոն Instagram-ում կիվել է իր եւ երեխաների հանգստյան օրերի ժամանցով...

• «Armflix»-ի «Տանդեմ» սերիալի առաջին 3 սերիաների ցուցադրությունը, կարմիր գորգն ու հայտնի հյուրերը (VIDEO)

  «Մոսկվա» կինոթատրոնում երեկ՝ ապրիլի14-ին, կայացավ «ՄԵՆՔ» հոլդինգի, նոր՝ «Տանդեմ» քրեական դրամայի առաջին երեք սերիաների ցուցադրությունը...

• «Քաղցր բամբակ»՝ Netflix»-ից. Գայ Ռիչիի «Ջենտլմենները»

  «Ջենտլմենները» սերիալ է՝ հիմնված Գայ Ռիչիի համանուն քրեական կատակերգության վրա, եւ նվիրված է լոնդոնյան քրեական աշխարհին…

• «Ամերիկացին»՝ Հայատանում. Ժան Նշանյանը՝ որդու՝ Արմանի հետ աշխատելու, Նարինե Գրիգորյանը՝ Հովիկ Կեուչկերյանի կողքին «փոքր կին» զգալու մասին

  Ապրիլի 4-ից հայաստանյան էկրաններ է բարձրացել «Ամերիկացի» ֆիլմը: Ֆիլմի ռեժիսորը եւ գլխավոր դերակատարը Մայքլ Գյույրջյանն է, պրոդյուսերը՝ Արման Նշանյանը…

• Գոհար Ավետիսյանը՝ երկու էկզոտիկ կերպարով. «բարոյականության պահապանները» կարծում են, որ «հայուհիներն այդպես չեն հագնվում»

  Հայկական ծագմամբ ռուս դիմահարդար Գոհար Ավետիսյանը ներկայացել է երկու էկզոտիկ կերպարով…

• Տոմա Պետրոսյանն ամուսնացել է. դերասանուհու անձնական կյանքի մանրամասները՝ նոր՝ «Տարան-տարան» ստենդափում

  Տոմա Պետրոսյանն ամուսնացել է. իր կյանքի նշանակալից փոփոխության մասին դերասանուհին պաշտոնապես հայտարարեց իր նոր՝ «Տարան-տարան» ստենդափի շրջանակում...

• «Բոլոր թեմաներին անդրադառնում ենք, հումորը հումոր է մնում». Հովհաննես Դավթյանը՝ իր ստենդափների, կանանց նվիրված «Կաբlook»-ի ու «լճացման» փուլերի մասին

  NEWS.am STYLE-ի հետ զրույցում Հովհաննեսը պատմել է, թե ինչպես են ստղծվում իր ներկայացումները, խոսել է կանանց, մարդկանց անձագանքների ու իր «Կաբlook» ստենդափի մասին...

ԱՄՆ-ում բնակվող հայազգի դերասան Րաֆֆի Բարսումյանը շատերի համար բացահայտում դարձավ ամերիկյան ամենահայտնի հեռուստասերիալներից մեկի՝ «Վամպիրի օրագրեր»-ի 5-րդ եթերաշրջանից: Արտահայտիչ դիմագծերով հայ երիտասարդը սերիալում մարմնավորում էր եթերաշրջանի գլխավոր չարագործին՝ Մարկոսին, որն ամեն կերպ կանգնում էր հերոսների ճանապարհին: Րաֆֆին Լոս Անջելեսում հայտնի է նաեւ թատերական աշխարհին: Նա խաղում է Շեքսպիրի կենտրոնի ներկայացումներում եւ ասում՝ թատրոնն իր կյանքում առանձնահատուկ տեղ է գրավում:

Օրերս CBS հեռուստաալիքի եթերում հայտնվեց Քրեյք Սուինիի նոր հեռուստասերիալը՝ The Code-ը («Կոդեքս»), որտեղ մեր հայրենակիցը մարմնավորում է գլխավոր հերոսներից մեկին՝ հրամանատար Ռամի Ահմադիին: Հեռուստասերիալը ռազմածովային ուժերի աշխատակիցների մասին է, իսկ առաջին սերիան հեռարձակվել է ապրիլի 9-ին: Սերիալում նկարահանվել են նաեւ ամերիկյան կինոյի հայտնի դերասաններ Դանա Դելանին, Աննա Վուդը, Լյուք Միտչելը եւ այլք:

NEWS.am STYLE-ն, իհարկե, չէր կարող անտարբեր անցնել Րաֆֆիի հերթայկան հաջողության կողքով: Մենք զրուցել ենք դերասանի հետ՝ նոր աշխատանքի, սպասումների, կերպարի առաձնահատկությունների եւ առաջիկայում Հայաստան այցելելու ծրագրերի մասին:

Րաֆֆի, նախ՝ շնորհավորում եմ CBS-ի The Code («Կոդեքս») հեռուստասերիալում առաջատար դերի համար. դե, պատմիր՝ ինչպե՞ս ստացար այդ աշխատանքը:

Շնորհակալ եմ…Այո, իսկապես, հաճույքով եմ աշխատում ամերիկյան այս հեռուստասերիալում, որը ռազմական թեմայով է: Սկզբում քասթինգ եմ անցել հեռուստանախագծի ռեժիսորի մոտ, իսկ հետո՝ դրա հեղինակի, որից հետո ինձ լսել են նաեւ պրոդյուսերները: Երեւի մոտ երեք առանձին քասթինքների միջով եմ անցել, եւ վերջապես ստացել այդ դերը:

Քո կերպարը՝ Ռամի Ահմադին, ֆիլմի գլխավոր հերոսներից է: Հե՞շտ է մարմնավորել սպայի կերպարը: Գիտեմ, որ որոշ դերաաններ մինչ կերպարին մարմնավորելը տվյալ մասնագիտության մեջ որոշ հետազոտություններ են անում, շփվում իրենց կերպարներին նման մարդկանց հետ…

Իրադարձությունները տեղի են ունենում շատ հատուկ մի վայրում: Ռամի Ահմադին ծովային հրամանատար է, որն աշխատում է ԱՄՆ-ի դատախազությունում: Նա  ունի շատ լավ թիմ, որոնք բոլորն էլ իրենց գործին նվիրված փորձառու մասնագետներ են: Ես շատ եմ կարդացել, որպեսզի հասկանամ, թե ինչպես են աշխատում այդ ոլորտում, ինչ գործառույթներ են կատարում, որպեսզի պատկերացնեմ, թե ինչ ճանապարհ պետք է անցած լինի իմ հերոսը, մինչեւ գլխավոր հրամանատար դառնալը: Դրան զուգահեռ ուսումնասիրում էի նաեւ օրենսդրությունը. ռազմածովային օրենքները տարբերվում են: Բարեբախտաբար, մեզ հնարավորություն ընձեռվեց շփվելու համապատասխան մասնագետների հետ, որոնք շատ լավ գլուխ են հանում այս գործից, եւ ես հաճախ էի նրանց դիմում խորհուրդի համար:

Քո մասնակցությամբ նախորդ հեռուստասերիալը՝ «Վամպիրի օրագրերը», ֆանտաստիկ ժանրում էր: Ո՞ր ֆիլմն ու կերպարն են իրենց ժանրով ավելի մոտ քեզ:

Կարծում եմ՝ ամեն ժանրն ունի իրեն հատուկ հետաքրքրությունները եւ յուրաքանչյուրն էլ մարտահրավեր է դերասանի համար. չեմ կարող ասել, թե որն եմ ավելի շատ նախընտրում: Որպես հեռուստադիտող՝ հետաքրքրությամբ դիտում եմ տարբեր ժանրի ֆիլմեր, ինձ համար կարեւոր է, որ ներկայացված պատմությունը հետաքրքիր լինի: Այս վերջին տարվա ընթացքում, իսկապես, հաճույքով եմ մարմնավորել Ռամի Ահմադիի կերպարը: Նա ձգտում է կատարելության, փորձում է ամեն կերպ լինել օգտակար: Կարծում եմ՝ նման մարդկանց մեջ կան եւ հիացմունքի, եւ ինչ-որ տեղ նաեւ հումորի տարրեր:

Հայտնի գործընկերներիդ հետ աշխատանքի մասին ի՞նչ կասես:

Նախագծում ներառված դերասաններն, ուղղակի, հրաշալի են՝ աննկարագրելի տաղանդավոր, բայց ամենակարեւորն այն է, որ նաեւ շատ լավ մարդիկ են: Դանա Դելանին շատ պահանջված դերասանուհի է այստեղ, նա հայտնի է բազմաթիվ ֆիլմերից ու նախագծերից: Առանձնակի հաճելի է նրա հետ աշխատելն ու նրանից մասնագիտական խորհուրդներ ստանալը: Առհասարակ, բոլորն էլ բարի են, հանճարեղ, աշխատասեր, նրանցից շատերը հեռուստատեսային մեծ փորձ ունեն: Այսպիսի պրոֆեսիոնալների կողքին աշխատելը կրկնակի հաճույք է, եւ ուրախ եմ, որ այս հրաշալի ճանապարհորդությունը հենց նրանց հետ եմ անցնում:

«Վամպիրի օրագրերը» ամերիկյան ամենառեյտինգային հեռուստասերիալներից դարձավ. Ի՞նչ ես կարծում`«Կոդեքսը» նման հաջողության հասնելու շանսեր ունի՞:

Դե, դա դեռ մեծ հարց է: Հուսով եմ՝ այո: Այս պահին ինձ պարզապես հաճելի է մի նոր ու հետաքրքիր նախագծի մասնիկը լինելը: Մենք զրոյից ենք կերտել այս շոուն, Իսկ որպես դերասան՝ ոչ միշտ է հաջողվում որեւէ նախագծում ներառված լինել հենց սկզբից: Ուրախ եմ, որ այս նախագիծը կյանքի է կոչվում նաեւ իմ մասնակցության շնորհիվ եւ, իհարկե, հույս ունեմ, որ մեզ կսիրեն շատերը եւ մենք ավելի լայն լսարանների կհասնենք:

Բավականին, հիացմունքով ես խոսում նախագծի մասին. ի՞նչն է քեզ հատկապես գրավում դրա մեջ:

Ինձ համար ռազմական ոլորտը միշտ էլ հետաքրքիր է եղել: Այն առանձնահատուկ մշակույթ է՝ իր կանոններով, կոդերով ու ավանդույթներով հանդերձ: Դրա պատմությունն ահռելի է ու հետաքրքիր: Բացի այդ՝ մեծ պատիվ է մարմնավորել մարդկանց, որոնք իրենց կյանքը նվիրում են հայրենիքին ծառայելուն: Մենք դերասան ենք, այդ ամենը միայն ձեւացնում ենք եւ երբեք չենք կարող իմանալ, թե ինչ է դա իրականում նշանակում, բայց այդ ամենը պատկերացնելն անգամ դրամատիկ է: Պետք է ջանք չխնայենք իրենց աշխատանքն արժանվույնս ներկայացնելու համար՝ որպես հարգանքի տուրք այս մասնագիտության տեր մարդկանց:

Բացի ֆիլմերից՝ նաեւ թատրոնում ես աշխատում… Այս ընթացքում այդ ոլորտում նորություններ ունե՞ս:

Այո, ես միշտ կլինեմ թատրոնում: Կենդանի խաղը կախարդական մի բան է եւ միշտ բարձր է պահում դերասանական հմտություններդ: Այն, իսկապես, փորձություններով լի է, եւ ես միշտ փնտրում եմ թատրոնում խաղալու հնարավորություններ: Վերջին անգամ ներկայացում ունեցել եմ մինչեւ «Կոդեքս» հեռուստասերիալի նկարահանումները սկսելը: Խաղացել եմ Շեքսպիրի գործերից Henry IV ներկայցման մեջ: Հրաշալի գործ էր, որտեղ ներառված էր նաեւ Թոմ Հենքսը:

Իսկ «Կոդեքս»-ի նկարահանումները դեռ շարունակվո՞ւմ են: Հայտնի՞ է, թե քանի եթերաշրջան այն կունենա:

Մոտ մեկ ամիս առաջ ավարտեցինք առաջին եթերաշրջանի նկարահանումները, որից հետո նոր առաջին սերիան եթեր հեռարձակվեց: Առայժմ միայն 12 սերիա ենք նկարահանել: Հուսով եմ՝ առաջիկայում կհայտարարեն այլ եթերարջանների մասին:

Րաֆֆի, հիշում եմ՝ մեր առաջին հարցազրույցի ժամանակ նշել էիր, որ մեծ ցանկություն ունես այցելելու Հայաստան: Այս ընթացքում հասցրե՞լ ես իրականացնել այդ նպատակդ:

Ցավոք՝ պետք է ասեմ, որ դեռ նման հնարավորություն չեմ ունեցել: Վերջին անգամ Հայաստանում եղել եմ 2005 թ-ին, ինչպես նշել էի այդ հարցազրույցի մեջ, եւ դա դեռեւս իմ միակ այցն է եղել հայրենիք: Լսել եմ՝ այս տարիների ընթացքում Հայաստանում շատ փոփոխություններ են եղել, հետեւում էի Թավշյա հեղափոխության ամբողջ ընթացքին: Կարծես, թե հիմա շատ հետաքրքիր ժամանակաշրջան է այցելության համար, անհամբերությամբ սպասում եմ այդ ճանապարհորդությանը:

Իսկ հայկական ֆիլմեր կամ սերիալներ դիտե՞լ ես: Հետաքրքիր է իմանալ քո կարծիքը հայկական ֆիլմարտադրության մասին:

Չէի ասի, թե հայկական արտադրության շատ ֆիլմեր եմ դիտել: Այս տարիների ընթացքում Հայկոյի եւ Մկոյի սքեթչերն եմ դիտել, ինչպես շատերը (ժպտում է): Կարծում եմ՝ հրաշալի էին մարմնավորում այդ բոլոր կերպարներին: Իսկ էլ ի՞նչ կառաջարկեիք դիտել…

Սյունե Առաքելյան

Լուսանկարները՝ Րաֆֆի Բարսումյանի անձնական արխիվից

Հետևեք NEWS.am STYLE-ին Facebook-ում, Twitter-ում և Instagram-ում