Դիմա Բիլանի, Եվգենի Պլյուշչենկոյի եւ Էդվին Մարդոնի եվրատեսիլյան ելույթը՝ Երեւանում (ֆոտոռեպորտաժ եւ տեսանյութ)

23:47, 5 մարտի

Րոպեներ առաջ Կարեն Դեմիրճյանի անվան մարզահամերգային համալիրում կայացավ «Սառույցի թագավորները» շոուն՝ Եվգենի Պլյուշչենկոյի, Իրինա Սլուցկայայի, Էդգար Հակոբյանի, Հայկոյի, Գեւ Մանուկյանի եւ մի շարք այլ հայտնի գեղասահորդների, երաժիշտների եւ պարողների մասնակցությամբ: Համերգի գլխավոր անակնկալներից էր նաեւ ռուս հայտնի երգիչ, «Եվրատեսիլ 2008»-ի հաղթող Դիմա Բիլանի ելույթը:

«Շատ շնորհակալ եմ ձեր սիրո եւ ջերմության համար: Հայաստանում հաճախ չեմ լինում, բայց ստացածս ջերմությունն, իսկապես, կբավարարի ինձ դեռ երկար ժամանակ»,-նշեց աշխարհահռչակ գեղասահորդ Եվգենի Պլյուշենկոն:

Համերգին ներկա էր նաեւ ՀՀ առաջին տիկին Ռիտա Սարգսյանը:

«Հիանալի շոու է կազմակերպված, ուրախ եմ, որ այն տեղի է ունենում Հայաստանում: Զգում եմ հիանալի էներգետիկա, քանի որ հրաշալի հանդիսատես ու պրոֆեսիոնալ գեղասահորդներ են այստեղ հավաքված»,- NEWS.am STYLE-ի հետ զրույցում նշեց ամերիկահայ պարող Գեւ Մանուկյանը, որը Հայաստանում գտնվում է երկրորդ անգամ:

Դիմա Բիլանը եւս հայտարարեց, որ շնորհակալ է դահլիճում տիրող ջերմության համար.

«Իրականում ոչ թե դուք եք եկել այս շոուն վայելելու, այլ մենք ենք եկել ձեր ներկայությունը վայելու»,-նշեց երգիչը, որը համերգի ընթացքում կատարեց իր արդեն իսկ սիրված երգերից մի քանիսը, այդ թվում՝ «Не Молчи», «Невозможное возможно», «Number Օne Fan», եւ «Believe» հիթերը: Վերջին երգը կատարելու ընթացքում Բիլանին միացան նաեւ Եվգենի Պլյուշչենկոն եւ հայտնի երաժիշտ, ջութակսահար Էդվին Մարդոնը:

Ոգեւորված երգիչը նկատեց. «Անհավանական է... «Եվրատեսիլից» հետո կրկնում ենք այս պատմական պահն ու ելույթ ունենում այս կազմով: Եվ դա անում ենք հենց այստեղ՝ Հայաստանում: Բիլանի նշած պատմական ելույթով էլ ավարտվեց սիրված աստղերի շոուն Հայաստանում:

Դիմա Բիլանի եւ Պլյուշչենկոյի աստղային ելույթներին կարող եք հետեւել NEWS.am STYLE-ի տեսանյութում եւ ֆոտոռեպորտաժում:

Սյունե Առաքելյան

Լուսանկարները՝ Մելինե Տոնոյանի