• «Մամայի Բալա»-ն վերադառնում է․ նոր եթերաշրջանում՝ նոր խառնաշփոթ, սեր ու անսպասելի փորձություններ

  Սվետայի տունը կրկին պատրաստվում է վերածվել ամենաանկանխատեսելի ու զվարճալի վայրերից մեկի...

• «Մի գդալ սեր»՝ ֆիլմ, որի յուրաքանչյուր դետալում սեր կա․ պրեմիերա, կարմիր գորգ, խոստովանություններ

  Գրեթե մեկ տարի անց «Մի գդալ սեր» ֆիլմը պատրաստ է հանդիպելու հանդիսատեսին․․․

• «Գերին և Գրեյսը»․ հույսի և մենության մասին տրագիկոմեդիան հայ հանդիսատեսին կներկայացնեն Հովհաննես Բաբախանյանն ու Նարինե Չիլինգարյանը

  ԱՄՆ-ում բնակվող ՀՀ վաստակավոր արտիստ Հովհաննես Բաբախանյանը սեպտեմբերին հյուրախաղերով հանդես կգա հայրենիքում...

• Բլոգեր Նուշիկ Օհանյանի ամուսինը, մեկ տարի կոմայի մեջ գտնվելուց հետո, մահացել է

  Բլոգեր Նուշիկ Օհանյանի ամուսինը, մեկ տարի կոմայի մեջ գտնվելուց հետո, մահացել է…

• Ալեն Սիմոնյանի շնորհավորանքը կնոջը՝ Անելյա Գուբրյանին, 26-ամյակի առթիվ (ֆոտո)

  Անվտանգության խորհրդի քարտուղար Ալեն Սիմոնյանի կինը՝ մոդել Անելյա Գուբրյանն, այսօր՝ սեպտեմբերի 2-ին, նշում է ծննդյան 26-ամյակը…

• ArmenՅԱՆs. Ջեք Թոփալյան՝ «էյֆորիայի» հայ աստղը․ ինչպե՞ս բիզնեսը փոխարինեց դերասանի կարիերայով, «տանջեց» Ջեյքոբ Էլորդիին ու հայերեն խոսեց ամերիկյան հայտնի սերիալում

  Մենք՝ հայերս, աշխարհի որ երկրում էլ լինենք, միշտ հպարտություն ենք ապրում, երբ մեր հայրենակիցներից մեկին հանկարծ տեսնում ենք որևէ խոշոր միջազգային նախագծում...

• Անձրևի և կայծակի պատճառով հետաձգվել է Էրիկի մենահամերգը

  Համերգի մեկնարկից հետո երգիչը հասցրել է մի քանի երգ կատարել, սակայն ուժեղ անձրևի և կայծակի պատճառով միջոցառումը ստիպված են եղել դադարեցնել։ Էրիկ Կարապետյանն ավելի ուշ իր ինստագրամյան սթորիում հայտնել է, որ համերգը տեղափոխվում է սեպտեմբերի 3-ին՝ ժամը 20:30-ին...

• Մոհաննայի «Անպայման»-ը․ նոր երգ, նոր տրամադրություն ու սիրելի տղամարդուն ուղղված երաժշտական խոստովանություն

  Մոհաննան ներկայացրել է իր նոր՝ «Անպայման» երգը, որն արդեն հասանելի է նաև ամբողջական տեսահոլովակով։ Նոր աշխատանքով երգչուհին ոչ միայն շարունակում է իր երաժշտական ճանապարհը, այլև բացում է իր զգացմունքային աշխարհի մի նոր էջ՝ երգը նվիրելով իր սիրելի տղամարդուն...

Հայկական, իսպանական, ֆրանսիական եւ գնչուական մշակույթների միաձուլումից ծնվում է մի յուրօրինակ ֆլամենկո՝ Լորի Բաղդասարյանի ֆլամենկոն։

Ֆլամենկոյի ֆրանսահայ արտիստ Լորի Բաղդասարյանը, որն առավել հայտնի է Lori La Armenia անունով, ծնվել է Փարիզում, մեծացել գնչուական միջավայրում, ապրել Իսպանիայում եւ այս երեք մշակույթները համադրելով հայկական արմատների հետ՝ ձեւավորել է իր պարային ուրույն ոճը։

NEWS.amSTYLE-ը խոսել է ստեղծագործական մեծ ճանապարհ անցած, իր գործին իսկապես նվիրված, մարդկային բարձր հատկանիշներ ունեցող արտիստի հետ եւ մանրամասներ պարզել նրա կյանքի, գործունեության, ֆլամենկոյի հանդեպ ունեցած մեծ կրքի, հայկական արմատների, առաջիկա ծրագրերի եւ Հայաստանում ելույթ ունենալու մասին։

Ինչպե՞ս սիրահարվեցիք ֆլամենկոյին եւ ինչու՞ եք ընտրել Lori La Armenia բեմական անունը:

«Սեր առաջին հայացքից» կամ «սեր առաջին հնչյուններից»։

Իմ կյանքը միշտ երաժշտությամբ լի է եղել, բայց ամեն ինչից վեր հիշում եմ, թե ինչպես էր հայրս Խուան Սերանո եւ Պակո դե Լուսիա լսում: Հիշում եմ՝ մեր գնչու հարեւաններին, որոնք օր ու գիշեր նվագում ու երգում էին: Ես մեծացել եմ գնչուների միջավայրում եւ ինչպես նրանք էին ասում՝ ես սկսել եմ պարել նախքան քայլելը:

Իսկ ՀՆՉՅՈՒՆՆԵՐԸ... երբ ես լսեցի երաժշտական այս ուղղության հիմքը հանդիսացող մեղեդիները, գնացի Անդալուսիա եւ մոտ տասը տարի ապրեցի այնտեղ՝ սովորելով ամեն ինչ այս հնագույն եւ հարուստ մշակույթի մասին: Երբ ես ապրում էի Խարես դե լա Ֆրոնտերայում, աշխատանքի հրավեր ստացա իմ մաեստրա Մանուելա Կարպիոյի կողմից։ Նա ասաց. «Մենք քեզ Lori La Armenia կանվանենք, քանի որ ազգիդ ուժն ու վիշտը քո մեջ է»:

Դժվար չէ՞ ամեն ելույթի ժամանակ փոխանցել ձեր հոգում կուտակված զգացողություններն ու էմոցիաները: Ինչպե՞ս է ձեզ հաջողվում:

Իհարկե, դժվար է։ Դա քրտնաջան աշխատանքի արդյունք է: Ֆլամենկոյում դու երբեք չես կարող ձեւացնել, քանի որ հանդիսատեսը տեսնում է քո զգացմունքները: Ուստի, հնարավոր չէ կեղծել: Գաղտնի՞քը. պրոֆեսիոնալիզմն ու արտիստների փոխհամագործակցությունն են: Ամեն ինչ կախված է երգող, պարող եւ նվագող արտիստների համատեղ աշխատանքից, ներդաշնակ հաղորդակցությունից: Այս ամենի համար գիտելիք, հմտություն, կենտրոնացում եւ իմպրովիզացիա անելու ունակություն է հարկավոր, քանի որ մշտապես պետք է գտնես «Duende»-ն՝ ֆլամենկոյի ոգին:

Ֆլամենկոն եւ աշխատա՞նք, եւ հոբբի՞ է ձեզ համար: Ինչո՞վ եք զբաղվում պարելուց զատ։

Ինչպես բեմի եւ հատակի, այնպես էլ աշխատանքի եւ հոբբի միջեւ ոչ մի տարբերություն չեմ տեսնում: Ֆլամենկոն ավելին  է, քան երաժշտությունը: Այն կենսաձեւ ու մտածելակերպ է, ամենօրյա արվեստ ու մարտահրավեր: Լինելով ֆլամենկոյի արտիստ՝ դու պետք է իմանաս, թե ինչպես է պետք կիսել քո ուրախությունը, կարողանաս գեղեցկություն գտնել անճոռնիության մեջ, պետք է իմանալ, թե ինչպես կարելի է յուրաքանչյուր ակնթարթ իմպրովիզացիա անել եւ գտնել իդեալական «Compas»-ը՝ ռիթմը: Իսկ բացի պարելուց, սիրում եմ պատրաստել եւ հաճելի ժամանակ անցկացնել ընկերներիս հետ:

Դուք բազմաթիվ արտիստների հետ եք աշխատել: Ո՞ր համագործակցությունը կառանձնացնեք:

Ես աշխատել եմ եւ հայտնի (Իրինա Բրուք, Գիյոմ Գալյեն, Ժիրայր Փափազյան, Կենդժի Ժիրակ, Մանուելա Կարպիո, Կարմեն Լեդեսմա, Dj Click եւ ուրիշներ), եւ անհայտ արտիստների հետ, բայց կնշեմ միայն մի բան՝ մարդկային հարաբերություններն ու ազնվությունը քո գործում:

Պատմեք ձեր հայկական արմատների մասին:

Ես  100%-ով հայ եմ: Հայրական կողմից արմատներով Էրզրումից ու Ադիյամանից եմ, իսկ մայրական կողմից՝ Կոնիայից եւ Կարամանից: Իմ նախնիները Ցեղասպանության վերապրածներ են, ովքեր գնացել են Բեյրութ, որտեղ մեծացել են իմ ծնողները: Սակայն Լիբանանի քաղաքացիական պատերազմի հետեւանքով ընտանիքս հայտվել է Փարիզում, որտեղ էլ ծնվել եմ ես:

Դուք եղել եք Հայաստանում եւ մտադիր էիք ֆլամենկոյի դպրոց բացել: Հաջողվե՞ց:

Հնարավորության դեպքում գալիս եմ Հայաստան: Երանի մի օր կարողանամ Հայաստանում բացել ֆլամենկոյի դպրոց-ակումբ, որտեղ երաժիշտները հնարավորություն կունենան նվագել, պարել սովորել եւ կիսվել իրենց փորձով: 

Ձեր կարծիքը Հայաստանում ֆլամենկոյի արտիստների մասին: Համագործակցե՞լ եք նրանց հետ:

Իհարկե: Ես բախտ եմ ունեցել հանդիպել ու աշխատել Հակոբ Ջաղացպանյանի եւ «Լոս Լոկոս» կիթառահարների համույթի հետ: Մենք արդեն լավ ընկերներ ենք, քանի որ ունենք նույն սերն ու կիրքը իսպանական մշակույթի հանդեպ: Հայաստան կատարած յուրաքանչյուր այցի ժամանակ մենք միասին նվագում ենք երեւանյան ակումբներից մեկում:

Պատմեք ձեր հետագա քայլերի մասին: Ի՞նչ ծրագրեր կան ապագայում:

Ես վերջերս եմ ավարտել Dj Click-ի հետ մեր «BalkAnadalucia» շրջագայությունը: Եվ ուրախ եմ, որ մյուսը տարի կրկին կաշխատեմ անվանի արտիստների հետ հանդես կգամ երաժշտական տարբեր նախագծերում:

Հոկտեմբերից մինչեւ հունվար հանդես եմ գալու Փարիզի լավագույն շոուներից մեկում՝ գնչուական կրկեսի ծրագրում: Իսկ նոյմեբերի 28-ին պարելու եմ նաեւ Տ. Չուխաջյանի «Կարինե» օպերայում՝ Ժիրայր Փափազյանի ղեկավարությամբ:

Նոյեմբերի 10-ին Փարիզում մասնակցելու եմ Trabendo ակումբում կայանալիք «Amnesie Internationale» միջոցառմանը (միջոցառումը նախաձեռնել է «La Jeunesse Armenienne de France», «Ֆրանսիայի հայ երիտասարդություն» կազմակերպությունը՝ Շառլ Ազնավուրի հովանու նորքո), որում ներգրավված են այնպիսի հանրահայտ արտիստներ, ինչպիսիք են Ֆաադա Ֆրիդեն, Տիգրան Համասյանը, Շառլի Հեբդո շաբաթաթերթի թղթակից, երգիծաբան Մաթյե Մադենյանը, Dj Click-ը եւ շատ այլ աստղեր։ Միջոցառման նպատակն է հիշել եւ կանխել ցեղասպանությունները:

Ձեր պարային ոճի մեջ լինու՞մ են փոփոխություններ կամ այլ մշակույթներին բնորոշ պարային տարրերի միաձուլում:

Իմ պարային ոճը մշտապես փոխվում է՝ կախված այն վայրերից, ուր ես ապրում եմ, եւ այն արտիստներից, ում հետ աշխատում եմ: Չնայած ես ունեմ հայկական  էլեմենտներով հարուստ գնչուական ոճ՝ իմ կարիերայի ընթացքում ես ուսումնասիրել եմ նաեւ հիփ հոփ, էլեկտրո, ամերիկյան, բալկանիան երաժշտության ոճերը: Այս փորձարկումների եւ փոփոխությունների արդյունքում ես միշտ ավելի եմ մոտեցել իմ իրական ներաշխարհին, ինչի արդյունքում իմ ստեղծագործ միտքն ու խորեոգրաֆիկ հմտությունները ավելի են մեծացել:

Ե՞րբ եք պատրաստվում նորից գալ Հայաստան եւ համերգ տալ հայ հանդիսատեսի համար:

Որքան շուտ, այնքան լավ: Ես մինչեւ հուլիս բազմաթիվ ծրագրեր ունեմ Եվրոպայում: Միգուցե դրանից հետո: Լսել եմ, որ փառատոն կա օտար ափերում ապրող հայերի համար, որոնք գալիս ու ներկայացնում են իրենց արվեստը, կատարած գործերը: Ինչու ոչ, հնարավոր է այդ նախագծի շրջանակներում այցելեմ Հայաստան:

Պատրաստեց՝ Դիանա Հովհաննիսյան 

Լուսանկարները եւ տեսանյութերը՝ www.loriflam.com

Հետևեք NEWS.am STYLE-ին Facebook-ում, Twitter-ում և Instagram-ում