Կրակոտ ռիթմեր ու հումորային պատմություններ. Արա Մալիկյանն անհավանական էներգիա տարածեց Երեւանում (ֆոտո/վիդեո)

10:30, 5 հունիսի

Լիբանանահայ ջութակահար Արա Մալիկյանը կրկին իր անհավանական էներգիան տարածեց Երեւանում: Կարեն Դեմիրճյանի անվան մարզահամերգային համալիրում հունիսի 3-ին տեղի ունեցավ Իսպանիայում բնակվող մեր աշխարհահռչակ հայրենակցի եւ նրա խմբի՝ արդեն երկրորդ համերգը: Առաջինը 2023-ին էր, երբ հայ հանդիսատեսը հնարավորություն ունեցավ սեփական աչքերով տեսնել ու զգալ երաժիշտի կրակոտ էներգետիկան:

Посмотреть эту публикацию в Instagram

Публикация от NEWS.am STYLE (@style.news.am)

55-ամյա ջութակահարն իր՝ երբեմն դինամիկ, երբեմն՝ հուզիչ կատարումները, պարբերաբար, ընդհատում էր հումորով համեմված հետաքրքիր պատմություններով՝ հանդիսատեսին ընկղմելով «այլմոլորակային» ապրումների ու տրամադրության մեջ:

ARS_7799.JPG (967 KB)

Մալիկյանը համերգը սկսեց Կոմիտասի «Կռունկ» ստեղծագործությամբ, այնուհետեւ տրամադրությունը փոխվեց՝ մեկ կտորի մեջ միաձուլելով եւ թախիծ, եւ ժպիտ... ու շատ ծափեր: Իր խոսքում արտիստը շնորհակալություն հայտնեց հանդիսատեսին՝ իրեն ջերմ դիմավորելու համար, եւ խոստացավ՝ համերգը կտեւի «28 ժամ 33 վայրկյան»:

«Շատ հուզված ենք, շատ ուրախ եմ վերադառնալ հայրենիք, վերադառնալ Երեւան, այս դահիճ, ու կրկին զգալ ձեր՝ խենթացնող ներկայությունը»:

Լիբինանահայ արտիստն ամբողջ ընթացքում հանդիսատեսի հետ շփվում էր հայերենով: «Երբ 7-8 ամիս առաջ եկել էինք Հայաստան, բավական «գեշ» հայերենով էի խոսում, հիմա վերադարձել եմ, բայց, կարծես, ավելի «գեշ» եմ խոսում»,-իրեն բնորոշ հումորով նշեց Մալիկյանը:

ARS_7789.JPG (1.10 MB)

Նա բեմում, թեեւ, չմնաց 28 ժամ եւ 33 վայրկյան, բայց արտիստի տված էներգիան, վստահորեն, կուղեկցի հանդիսատեսին այդքան ժամ եւ ավելի:

Մալիկյանի հետ բեմում էին երաժիշտներ, որոնց հետ ջութակահարը երկար ճանապարհ է անցել, հանդես եկել աշխարհի հեղինակավոր բեմերում՝ դաշնակահար Իվան «Մելոն» Լյուիսը, կոնտրաբասահար Իվան Ռուիս Մաչադոն, թմբկահար Գեորվիս Պիկո Մելոնը եւ կիթառահար Դայան Աբադը:

ARS_8133.JPG (1.13 MB)

Համերգի վերջում երաժիշտը խոստովանեց, որ հանդիսատեսից ստացավ այն, ինչ փոխանցեց: «Ես կուզեի 28-ի փոխարեն 58 ժամ ձեզ համար նվագել, բայց մարմինս չի ձգում»,-կատակեց Մալիկյանը, որն իր համերգի վերջին կտորը նվիրեց հայրենիքին: «Հույսի կարիք շատ ունենք, կարիք ունենք ուրախության, որ մենք՝ հայերս, լավ ապրենք: Բառերս չեն հերիքում ավելին արտահայտել…»,-նշեց երաժիտը, որին հանդիսատեսը ոգեւորեց ու ճանապարհեց բուռն ծափահարություններով ու «բրավո»-ներով:

Արա Մալիկյանը Երեւանում ելույթ ունեցավ «ԹԻ ԷՄ փրոդաքշն»-ի հրավերով: