• Ի՞նչ է թաքնված «Ճերմակ շապիկի» տակ․ Թելման Խաչատրյանի ու Մերի Քոչարյանի հերոսների պատմությունը՝ մեծ էկրանին․ ֆիլմի պրեմիերան, կարմիր գորգն ու հայտնի հյուրերը (ֆոտո)

  Ի՞նչ պատմություններ են թաքնված ճերմակ շապիկներ կրող մարդկանց ներաշխարհում, հոգում ու հիշողություններում՝ հե՞րքում, կարո՞տ, ցա՞վ…

• Երբ հանգամանքները բացահայտում են մարդկանց. «Գիշատիչների խնջույքը» ֆիլմի պրեմիերան՝ «ՀանդArt»-ում

  Ի՞նչ է մնում մարդուց, երբ ընտրությունը սահմանափակվում է սեփական փրկությամբ...

• Ներսես Ավետիսյանն ամուսնալուծվել է

  Դերասան, երգիչ և հաղորդավար Ներսես Ավետիսյանն ամուսնալուծվել է…

• «ֆուլ Հաուս» ֆիլմը կունենա 2-րդ մաս

  Նախորդ տարի մեծ էկրաններ բարձրացած «ֆուլ Հաուս. վայրէջք» ֆիլմով թիմը չի սահմանափակվի…

• Զվարճալի իրավիճակներ, քաղաքական հումոր ու «Մուշեղի մահը»․ «Ֆուլ Հաուսը» վերադարձավ ներկայացման տեսքով (VIDEO)

  «Ֆուլ Հաուս»-ում կրկին թեժ են ժամանակին մեկ տան մեջ հայտնված ու անբաժան դարձած հերոսների հարաբերությունները...

• Արթուր Խաչենցը հայր է դարձել․ ի՞նչ հետաքրքիր անուն է նա ընտրել դստեր համար

  Երգիչ Արթուր Խաչենցն ու նրա կինը՝ Անժելիկան, օրերս ողջունել են իրենց առաջնեկին...

• «Մի գդալ սեր», Coca-Cola Fest ու հարսանիքներ․ Instagram-ը՝ նախորդ շաբաթ

  Նախորդ շաբաթ Instagram-ից սեր էր ճառագում։ Սիրո մասին նոր ֆիլմի պրեմիերա ու աստղային հարսանիքներ․․․ Սկսենք սկզբից...

• «Գեղեցիկ կադրը դեռ կինո չէ». Հովհաննես Ղազարյանը՝ ռեժիսորի աչքի, դերասանի ազատության և ժամանակի մասին

  Ի՞նչն է տարբերում ռեժիսորին պարզապես լավ նկարահանողից...

Միքայել Ոսկանյան. անուն, որի մասին, ամենայն հավանականությամբ, շատ շուտով կլսենք արտասահմանյան երաժշտական ալիքներից: Երիտասարդ եւ տաղանդավոր կոմպոզիտորն ու երաժիշտը NEWS.am STYLE-ին ներկայացրել է երաժշտական մենեջմենթի հաջողության գաղտնիքները:

Միքայել, նախ ցանկանում եմ շնորհավորել քեզ ու «Միքայել Ոսկանյան եւ ընկերներ» էթնո ջազ խմբին Van Music Awards -2012-ի տարվա լավագույն խումբ անվանակարգում հաղթելու կապակցությամբ:

Շնորհակալ եմ: Ցանկանում եմ շնորհակալություն հայտնել նաեւ կազմակերպիչներին եւ Շուշանիկ Արեւշատյանին:

Ո՞ր տարիքում հասկացար, որ քո ստեղծագործական գործունեությունը նվիրելու ես թառին:

18 տարեկանում, երբ ընդունվեցի Երեւանի պետական համալսարանի (ԵՊՀ) պատմության ֆակուլտետի արվեստաբանության բաժին, հասկացա, որ մասնագիտանալու եմ թառ նվագելու ուղղությամբ: Գիտակցական ամբողջ կյանքս, սկսած 6 տարեկանից, ժողովրդական երգեր եմ կատարել: Մինչ այդ բոլորն ասում էին. «Ինչի՞դ է հարկավոր թառի մասնագիտացումը: Ինչպե՞ս ես դրամ վաստակելու այդ գործիքի վրա նվագելով»: Բայց ես վճռական էի. իմ առջեւ նպատակ դրեցի եւ բոլորին ասում էի, որ պետք է հասնեմ նրան, որ թառ նվագելով վաստակեմ:

Իսկ մինչեւ ԵՊՀ ընդունվելը որեւէ տեղ երաժշտական կրթություն ստացե՞լ ես:

Այո, երաժշտական կրթությունս ստացել եմ ժողովրդական գործիքների 7-ամյա երաժշտական դպրոցում, թառի եւ վոկալի բաժնում, բայց ինձ ավելի շատ վոկալիստ էի պատկերացնում, քան ժողովրդական գործիք նվագող: Վատ թառահար էի, մասնագիտանում էի վոկալում, բայց 6-7-րդ դասարանում սկսեցի նորմալ պարապել եւ արդյունքում երաժշտականն ավարտեցի գերազանցությամբ:

Լինելով ԵՊՀ ուսանող, պարբերաբար հաճախում էի կոնսերվատորիա, շփվում երաժիշտների եւ դասախոսների հետ, ստանում այն փորձն ու ունակությունները, որոնք ինձ անհրաժեշտ էին եւ հետաքրքիր: Այդ տարիներին էլ աշխատանքի անցա Հայաստանի ժողգործիքների պետական նվագախմբում, որտեղ աշխատում եմ մինչ օրս:

Բացի թառ նվագելուց, նաեւ ժողովրդական երգերի եւ ավանգարդ ստեղծագործությունների հեղինակ ես: Քո կոմպոզիտորական տաղանդը վաղո՞ւց ես հայտնաբերել:

Կարելի է ասել, որ գրում եմ մանկուց, բայց լուրջ ստեղծագործություններ սկսեցի գրել 17-18 տարեկանում: Օրինակ, իմ գրած առաջին ժողովրդական երգերից «Հելնիմ սարը», որը կատարում է հրաշալի երգչուհի Գոհար Հովհաննիսյանը, ժողովրդի շրջանում մեծ տարածում գտավ:

Կարելի՞ է ասել, որ ներկայում դու Հայաստանի ամենից հայտնի թառահարն ես:

Ես, իհարկե, չեմ ուզում այդ մասին ինքս դատել: Մենք շատ հրաշալի թառահարներ ունենք, բայց, ցավոք, լայն լսարանին նրանք հայտնի չեն: Պարզապես ասեմ, որ որպես թառահար Հայաստանում ինձ գիտեն: Բանն այն է, որ մեր ժամանակներում մեծ դեր ունեն PR-ն ու գրագետ մենեջմենթը, որին ես մեծ նշանակություն եմ տալիս: Ոչ պակաս կարեւոր նշանակություն ունի նաեւ այն, որ ես տարբեր ոճերում եմ նվագում. ինձ լսում են ե՛ւ երիտասարդությունը, ե՛ւ տարեց սերունդը, ռոքի, ջազի, ժողովրդական ստեղծագործությունների սիրահարները եւ այլն:

Ո՞ւմ ես պարտական այդքան հաջող մենեջմենթի համար:

Առաջին հերթին կնոջս՝ Լուսինեին, ով իմ օգնականն է: Մեզ համար սա յուրահատուկ ընտանեկան բիզնես է, որով զբաղվում ենք համատեղ:

Գիտեմ, որ հաճախ ես արտասահման համերգների մեկնում: Արդեն ո՞ր երկրներում ես թառը ներկայացրել որպես հայկական գործիք:

Համերգներով հանդես եմ եկել Եգիպտոսում, Ռուսաստանում, Վրաստանում, Շվեդիայում եւ Ֆինլանդիայում: Առայժմ համերգային շրջագայություններիս աշխարհագրությունն այսպիսին է: Իհարկե, ներկայացել եմ ոչ մենահամերգով, այլ նվագախմբի, Հայաստանի վաստակավոր արտիստ Արսեն Գրիգորյանի (Մրո), այլ խմբերի եւ երգիչների հետ: Հայրենիքից դուրս իմ միակ մենահամերգը պետք է կայանար Ֆինլանդիայում, Ալանդյան կղզիներում, Հայաստանի եւ Ադրբեջանի երաժիշտների փորձարարական համերգի շրջանակում, որը պետք է անցկացվեր 2012 թվականի օգոստոսի 10-ին, Մարիեհամն քաղաքի հրապարակում: Այնտեղ մենք ծանոթացանք ադրբեջանական երաժիշտների հետ: Սակայն, ճակատագրի հեգնանքով, առաջին իսկ օրը ձեռքս կոտրեցի եւ չկարողանա ելույթ ունենալ: Ծանր վիրահատություն տարա, ինչից հետո էլ 3-ամսյա վերականգնողական փուլ:

Ե՞րբ ես ծրագրում արտերկրում մենահամերգային շրջագայություններ սկսել: Վերջերս քո արվեստը նկատեցին եւ գնահատեցին Նյու Յորքում: Մի փոքր պատմիր այդ մասին:

Նյու Յորքից ինձ գրեցին «Made in New York Jazz Competition» մրցույթի կազմակերպիչները եւ ասացին, որ հետաքրքրված են իմ ստեղծագործությամբ: Ես տեսանյութ ուղարկեցի: Դրանից հետո արդեն ինձ զանգահարեցին եւ տեղեկացրեցին, որ տեսանյութը հավանել են, եւ այն ներկայացրել են առցանց քվեարկության: Հիմա քվեարկության առաջին փուլն է, եւ մենք դեռեւս երկրորդ տեղում ենք: Քվեարկության հաղթողը հնարավորություն կունենա մասնակցել հայտնի «New York Jazz Festival»-ին: Ի դեպ, օգտվելով առիթից, ուզում եմ բոլոր ցանկացողներին խնդրել քվեարկել մեր օգտին, եւ այդ կերպ օգնել մեզ թառը նյույորքյան հանդիսատեսին ներկայացնելու գործում:

Նաեւ մասնակցում եմ Օդեսայի ջազ փառատոնի ընտրական փուլին, որի հաղթողները հայտնի կդառնան առաջիկա օրերին: Ի տարբերություն Նյու Յորքի փառատոնի, ուր, եզրափակիչ անցնելու դեպքում, մեկնելու եմ «Միքայել Ոսկանյան եւ ընկերներ» խմբի հետ, Օդեսա գնալու եմ մենակ, որպես մենակատար: Օդեսայի մրցույթին մեր խմբից ներկայացված է նաեւ սաքսոֆոնահար Դավիթ Մելքոնյանը, նույնպես որպես մենակատար:

Բացի այդ, բավականաչափ հրավերներ ունեմ Ռուսաստանից եւ Վրաստանից: Մի քանի փառատոնների հրավերներ էլ բանակցությունների փուլում են:

Դու պատրաստվում ես թառը ներկայացնել որպես հայկական ժողովրդական գործիք, մինչդեռ 2012 թվականի դեկտեմբերին արեւելյան այս գործիքի ադրբեջանական կատարողական արվեստն ու դրա պատրաստման վարպետությունը ներառվել են ՅՈՒՆԵՍԿՕ-ի ոչ նյութական արժեքների ժառանգության ցանկում: 

Ես համաձայն չեմ ՅՈՒՆԵՍԿՕ-ի հետ, եւ դրա համար ծանրակշիռ պատճառներ ունեմ, չնայած արդբեջանական կատարողները վարպետորեն են տիրապետում թառ նվագելուն: Ինձ դուր է գալիս, թե ինչպես են նրանք նվագում: Սակայն եթե փորփրենք պատմությունը, ապա կնկատենք, որ ադրբեջանական թառահարների այդ բարձրակարգ կատարումն իրականում հիմնված է ամբողջ Կովկասի լավագույն թառահար Սողոմոն Սեյրանյանի կատարողական դպրոցի վրա, որն արդեն 10 տարեկանում սկսել է թառ նվագել: Նա ադրբեջանական հայտնի թառահարներ Հաջի Մամեդովի եւ Հասան Դադաշովի ուսուցիչն է եղել:

Ինձ համար ցավագին է փաստը, որ մեր պետությունը հատուկ ջանքեր չի գործադրում ժողգործիքների պահպանման եւ զարգացման գործում: Մենք չենք պահպանում մեր ունեցածը, իսկ մեր հարեւանները ջանասիրաբար յուրացնում են այն, ինչն իրենց չի պատկանում: Պատկերացրու, Պետական նվագախմբի երաժիշտները 40 հազար դրամ աշխատավարձ են ստանում, ինչի հետեւանքով բազմաթիվ լավ կատարողներ արդեն լքել են Հայաստանը: Ես ինքս էլ այդքան եմ ստանում:

Իրականում, թառը տարածաշրջանային գործիք է: Հայերի թառ նվագելու մասին վկայություններ կան միջնադարյան ձեռագրերում: Եկեք իրատես լինենք. ո՞ւր էին այն ժամանակ ադրբեջանցիները որպես ազգ:

Բացիր որեւէ գաղտնիք, որի մասին առայժմ ոչ մի հարցազրույցում չես խոսել:

Նախագահական ընտրություններում քվեարկել եմ Րաֆֆի Հովհաննիսյանի օգտին (ծիծաղում է):

Ինչպե՞ս ես վերաբերում նրան, որ արվեստագետները սկսում են զբաղվել քաղաքականությամբ:

Ճիշտ ասած, չեմ ողջունում: Յուրաքանչյուր մարդ պետք է իր գործով զբաղվի: Բայց միաժամանակ դա չի նշանակում, որ նա պետք է մի կողմ քաշվի երկրի քաղաքական իրադարձություններից:

Հայկական շոու-բիզնեսում քեզ ամենից շատ ի՞նչը դուր չի գալիս: 

Միօրինակությունը, երաժշտական ճաշակի բացակայությունը, անիմաստ մրցակցության առկայությունը: Շատ հաճախ երգիչներն ու երաժիշտները պատճենում են մեկը մյուսին:

Որքա՞ն հաճախ ես համերգներով հանդես գալիս, եւ որտե՞ղ կարող են ֆոլքի եւ ջազի սիրահարները ստեղծագործություններ ունկնդրել կենդանի կատարմամբ:

Վերջին շրջանում բավական հաճախ ենք համերգներով հանդես գալիս: Ճիշտ է, առայժմ սահմանափակվում ենք մեր ստեղծագործության երկրպագուների նեղ շրջանակի համար ելույթներով փաբերում եւ ջազ ակումբներում: Բայց շուտով նաեւ համերգ ենք ծրագրում մեծ լսարանի համար: Իսկ ելույթների մասին կարելի է տեղեկանալ իմ ֆեյսբուքյան էջում:

Միքայել, շնորհակալություն զրույցի համար: Քեզ ստեղծագործական հաջողություններ եւ ընտանեկան երջանկություն ենք մաղթում:

Ես նույնպես շնորհակալ եմ հետաքրքիր եւ բովանդակալից զրույցի համար: Շնորհակալություն NEWS.am STYLE-ին ինձ նկատելու համար:

Նաեւ հավելեմ. ցանկանում եմ, որ մեր հայրենակիցները սկսեն որակյալ երաժշտություն լսել: Դա հնարավոր է:

Զրուցեց՝ Մարկ Հովհաննիսյանը

Լուսանկարը՝ Ելենա Ֆրոլովա-Տրուֆանովայի

Ոճը՝ Լուսին Արցախի

Հետևեք NEWS.am STYLE-ին Facebook-ում, Twitter-ում և Instagram-ում